मुंबई: 'जत्रा' फेम क्रांती रेडकर (Kranti Redkar) लवकरच 'प्लॅनेट मराठी ओटीटी' वर पहिलावहिला मराठी रिअॅलिटी शो (Marathi Reality Show) घेऊन येत आहे. नेहमीच काही तरी हटके प्रयोग करणारे 'प्लॅनेट मराठी' पुन्हा एकदा नवीन संकल्पना घेऊन प्रेक्षकांच्या मनोरंजनासाठी सज्ज झाले आहेत. या रिअॅलिटी शोच्या माध्यमातून क्रांतीने निर्मीती क्षेत्रात पदार्पण केले आहे. प्लॅनेट मराठी सोबत क्रांतीची निर्मिती संस्था 'दॅट हॅप्पी गर्ल' (The Happy Girl) एक नवीन संकल्पना घेऊन प्रेक्षकांच्या भेटीला येत आहे. '

प्लॅनेट मराठी'च्या वर्षपूर्ती निमित्त अनेक नवनव्या वेबफिल्म्स, वेबसीरिज सोबत आणखी एका नव्या घोषणेने प्रेक्षकांचे लक्ष वेधले आहे ते 'रिअॅलिटी शो'ने. सध्या तरी या हटके प्रयोगाने सिनेसृष्टीत चांगलीच चर्चा सुरु झाली आहे. अद्याप तरी या शो बद्दलची माहिती प्रेक्षकांच्या समोर आलेली नाही. यासाठी थोडी वाट पहावी लागणार आहे. प्लॅनेट मराठी', अ व्हिस्टास कॅपिटल कंपनी नेहमीच प्रेक्षकांच्या मनोरंजनासाठी वैविध्यपूर्ण आशय घेऊन येत असते. त्यामुळे हा रिॲलिटी शोही प्रेक्षकांच्या नक्कीच पसंतीस उतरेल.

प्लॅनेट मराठीचे प्रमुख, संस्थापक अक्षय बर्दापूरकर म्हणतात, "प्रथमच मराठी ओटीटी प्लॅटफॉर्मवर रिॲलिटी शो सादर होणार आहे. क्रांती रेडकरच्या सोबतीने हा रिॲलिटी शो आम्ही प्रेक्षकांच्या मनोरंजनासाठी घेऊन येत आहोत. ही संकल्पना खूपच वेगळी असल्याने प्रेक्षकांसोबत आम्ही सुद्धा यासाठी खूप उत्सुक आहोत. लवकरच यातील एकेक पैलू उलगडणार आहेत.''

या शोबद्दल निर्माती क्रांती सांगते, "पहिल्यांदाच निर्माती म्हणून काम करताना मला एका चांगल्या ओटीटीसोबत काम करायचे होते. प्लॅनेट मराठी सोबत मी 'रेनबो' चित्रपट केला असल्याने त्यांच्यासोबत काम करण्याचा माझा अनुभव अप्रतिम आहे. त्यामुळे 'प्लॅनेट मराठी' हाच मला योग्य पर्याय वाटला. मुळात 'प्लॅनेट मराठी' हे खूपच दूरदर्शी आहे. प्रेक्षकांची आवड निवड त्यांना व्यवस्थित ठाऊक आहे. या शोच्या निमित्ताने 'प्लॅनेट मराठी'सोबत सुरु झालेला माझा हा नवीन प्रवास नक्कीच अविस्मरणीय असेल. विशेष म्हणजे या शोच्या माध्यमातून आम्ही अख्ख्या महाराष्ट्रात पोहोचणार आहोत. यानिमित्ताने नवोदितांना एक व्यासपीठ प्राप्त करुन देत आहेत.''