Alibaba Aani Chalishitale Chor:

मराठमोळा अभिनेता सुबोध भावे (Subodh Bhave), मुक्ता बर्वे (Mukta Barve), उमेश कामत (Umesh Kamat) आणि श्रृती मराठे (Shruti Marathe) यांच्या आगामी चित्रपट 'अलीबाबा आणि 'चाळीशी'तले चोर'मधील पहिलं गाणं रिलीज झाले आहे. 'अलीबाबा आणि 'चाळीशी'तले चोर' या चित्रपटाच्या पोस्टर, टीझरनंतर आता 'साला कॅरेक्टर' हे पहिलं गाणं आऊट झाले आहे. सध्या सोशल मीडियावर हे गाणं धुमाकूळ घालत आहे.

'साला कॅरेक्टर' हे गाणं (Saala Character Song) शाल्मली खोलगडेने आपल्या जबरदस्त आवाजामध्ये गायलं आहे. हे गाणं वैभव जोशी यांनी लिहिले आहे. तर अजित परब यांनी या गाण्याला संगीत दिले आहे. मस्तीने भरलेल्या या गाण्याला 'चाळीशी'तील मित्रमैत्रिणींचे गेटटूगेदर दिसत आहे. या गाण्यामध्ये सुबोध भावे, मुक्ता बर्वे, उमेश कामत, श्रृती मराठे, अतुल परचुरे, मधुरा वेलणकर आणि आंनद इंगळे यांनी खूपच धम्माल आणि मजामस्ती केल्याचे दिसत आहे.

युट्युबवर हे गाणं शेअर करत कॅप्शनमध्ये 'चाळीशी लागलेल्या डोळ्यांत जेव्हा फुलतात विशीतली स्वप्नं...मन स्वत:लाच समजावतं, थोडा टाईट थोडा लूज साला कॅरॅक्टर.' असे लिहिले आहेत. 'अलीबाबा आणि चाळीशीतले चोर' हा चित्रपट येत्या २९ मार्च पासून प्रेक्षकांच्या भेटीला येणार आहे. या गाण्याबद्दल दिग्दर्शक आदित्य इंगळे यांनी सांगितले की,'साला कॅरेक्टर' हे गाणं करताना ते सर्व वयोगटातल्या लोकांना सहज गुणगुणता यावं आणि नाचता यावं असा विचार होता ज्याला अजित परब आणि वैभव जोशी या दोन्ही अवलियांनी पुरेपूर न्याय दिला आहे. गाण्यावरून चित्रपटात काय धमाल येईल, याचा अंदाज तुम्ही बांधू शकता.'

दरम्यान, नितीन वैद्य प्रॉडक्शन्स प्रस्तुत, मृद् गंध फिल्म्स एल. एल. पी निर्मित या चित्रपटाचे आदित्य इंगळे हे दिग्दर्शक आहेत. या चित्रपटात मुक्ता बर्वे, सुबोध भावे, श्रुती मराठे, उमेश कामत, आनंद इंगळे, मधुरा वेलणकर आणि अतुल परचुरे हे कलाकार मुख्य भूमिकेत आहेत. विवेक बेळे लिखित या चित्रपटाचे नितीन प्रकाश वैद्य, वैशाली विराज लोंढे, निखिल वराडकर आणि संदीप देशपांडे निर्माते आहेत. हा चित्रपट प्रेक्षकांचे मनोरंजन करण्यासाठी सज्ज झाला आहे. या चित्रपटामध्ये या 'चाळीशी'तल्या चोरांचे काय होणार हे जाणून घेण्यासाठी २९ मार्चला हा चित्रपट पाहावा लागणार आहे.