सोमवारी १३ मे रोजी लोकसभा निवडणुकीच्या चौथ्या टप्प्याची मतदान प्रक्रिया पार पडली. काल नागरिकांनी मतदानाचा अधिकार बजावला. त्याचसोबत अनेक कलाकारांनी मतदान केले आहे. महाराष्ट्रात अमोल कोल्हे, सुबोध भावे, गिरिजा ओक अशा अनेक कलाकरांना मतदान केले. मतदान केल्यानंतर त्यांनी सोशल मीडियावर पोस्ट करुन माहिती दिली आहे. मतदान केल्यानंतर अभिनेता अमेय वाघनेदेखील सोशल मीडियावर पोस्ट केली आहे. या पोस्टच्या माध्यमातून त्याने सध्याच्या राजकीय स्थितीवर भाष्य केले आहे. (Amey Wagh Share A Post After Voting)

अमेय वाघने (Amey Wagh) मतदान केल्यानंतरचा फोटो सोशल मीडियावर शेअर केला आहे. यात अमेयने बोटावरची शाई दाखवून मतदानाचा हक्क बजावला असल्याचे सांगितले आहे. या पोस्टवर त्याने कॅप्शन दिले आहे की, आता कोणीही कोणत्याही पक्षात जावं आणि कोणाही बरोबर युती करावी यासाठी मी आज परवानगी देऊन आलो!. अमेयच्या या पोस्टची सोशल मीडियावर प्रचंड चर्चा आहे. अमेयने या पोस्टच्या माध्यमातून सध्याची राजकीय परिस्थिती दाखवण्याचा प्रयत्न केला आहे.

अमेयसोबतच काल अनेक कलाकारांनी मतदानाचा हक्क बजावला आहे. तर काही कलाकारांना मतदान करता आले नाही, याबद्दल खंत व्यक्त केली आहे. अभिनेता सुयश टिळकला काल मतदान करता आले नाही, त्यामुळे त्याने खंत व्यक्त केली होती. सुयशने काल बूथवर जाऊन आपले नाव शोधण्याचा प्रयत्न केला. परंतु त्याला नाव सापडलेच नाही. त्याच्या नावात काहीतरी चूक असल्याने त्याला मतदान करता आले नाही, यामुळे त्याने खंत व्यक्त केली होती.