भारतीय चित्रपटसृष्टीतील प्रसिद्ध दिग्दर्शक आणि निर्माते विपुल अमृतलाल शाह हे त्यांच्या दमदार आणि संस्मरणीय चित्रपटांसाठी ओळखले जातात, जे आजही प्रेक्षकांच्या मनात घर करून आहेत. आता ते आणखी एक प्रभावी प्रकल्प 'गव्हर्नर' प्रस्तुत करत आहेत, ज्यामध्ये अत्यंत प्रतिभावान अभिनेते मनोज बाजपेयी मुख्य भूमिकेत दिसणार आहेत. गव्हर्नर हा चित्रपट पॉलिटिकल थ्रिलर असणार आहे. ऑगस्ट २०२५ मध्ये चित्रपटाच्या शूटिंगला सुरुवात होईल असे म्हटले जात आहे.

चित्रपटाचे दिग्दर्शन चिन्मय मांडलेकर करत असून, निर्मिती विपुल अमृतलाल शाह आणि सहनिर्माते आशीन ए. शाह यांच्या 'सनशाईन पिक्चर्स' बॅनरखाली होणार आहे. हा चित्रपट एका माजी राज्यपालांच्या जीवनावर आधारलेला आहे. मागच्या वर्षी या राज्यपालांचं निधन झालं आहे, त्यांच्या जीवनातून प्रेरणा घेत चित्रपटाची कथा मांडली जाणार आहे. सध्या स्क्रिप्टशी संबंधित कागदपत्रांची प्रक्रिया सुरू असल्याने निर्माते अधिक माहिती गुप्त ठेवत आहेत. अभिनेते मनोज बाजपेयी आणि दिग्दर्शक चिन्मय मांडलेकर या चित्रपटाचं ४९ दिवसांचं शूटिंग पूर्ण करणार आहेत. ऑगस्टमध्ये मुंबईसह दोन शहरांमध्ये शूटिंग केले जाणार आहे.

‘गव्हर्नर’ची मूळ संकल्पना विपुल अमृतलाल शाह यांनी विकसित केली असून, त्यानंतर त्यांनी सुवेंदू भट्टाचार्य, सौरभ भारत आणि रवी असरानी यांच्यासोबत मिळून या चित्रपटाच्या पटकथेवर काम केलं आहे. मनोज बाजपेयी आणि विपुल शाह यांची ही पहिलीच जोडी असून, त्यांच्या या सहकार्यानं आधीच प्रेक्षकांमध्ये उत्सुकता निर्माण केली आहे.

एकीकडे गव्हर्नरच्या तयारीत शाह व्यस्त आहेत, तसंच ते लवकरच त्यांच्या दिग्दर्शनात तयार होणाऱ्या हिसाब या हाईस्ट थ्रिलर चित्रपटावरही काम करत आहेत, ज्यात जयदीप अहलावत आणि शेफाली शाह मुख्य भूमिकांमध्ये दिसणार आहेत. हिसाब २०२५ च्या उत्तरार्धात प्रदर्शित होणार असून, हा चित्रपट देखील सनशाईन पिक्चर्स आणि जिओ स्टुडिओजच्या बॅनरखाली तयार होत आहे. गव्हर्नर आणि हिसाब या दोन्ही चित्रपटांच्या माध्यमातून विपुल अमृतलाल शाह पुन्हा एकदा प्रेक्षकांसमोर आशयघन आणि दमदार कथा घेऊन येणार आहेत.