प्रसिद्ध दिग्दर्शक महेश मांजरेकर (Mahesh Manjrekar) सध्या त्यांचा आगामी चित्रपट 'पुन्हा शिवाजीराजे भोसले' मुळे (Punha Shivaji Raje Bhosale ) चांगलेच चर्चेत आहेत. 'पुन्हा शिवाजीराजे भोसले' चित्रपट वादाच्या भोवऱ्यात अडकला आहे. निर्माते आणि दिग्दर्शक महेश मांजरेकर यांच्या विरोधात मुंबई उच्च न्यायालयात तक्रार दाखल करण्यात आली आहे. ही तक्रार एव्हरेस्ट एंटरटेन्मेंट एलएलपी या चित्रपट निर्मिती कंपनीने केली आहे. चित्रपटाच्या संबंधित स्वामित्त्व हक्काचे (कॉपी राइट्स) उल्लंघन केल्याचा आरोप करण्यात आला आहे.

कंपनीने केलेल्या दाव्यात कराराचे उल्लंघन, कॉपीराइट्सचे उल्लंघन आणि जनतेची दिशाभूल करण्याचा आरोप केला आहे. या प्रकरणात आता महेश मांजरेकर यांनी प्रतिक्रिया दिली आहे. ते म्हणाले,"'पुन्हा शिवाजीराजे भोसले' हा चित्रपट केवळ ऐतिहासिक कथा नाही, तर ती महाराष्ट्राच्या आत्म्याला स्पर्श करणारी भावना आहे. या चित्रपटाचा पूर्वी प्रदर्शित झालेल्या सिनेमाशी थेट किंवा अप्रत्यक्ष संबंध नाही. हा सीक्वल, प्रीक्वेल किंवा दुसरा भाग नाही. हा सिनेमा पूर्णपणे स्वतंत्र, मौलिक आणि आमच्या मनातून, आमच्या श्रद्धेतून जन्माला आलेला आहे."

2009 साली 'मी शिवाजीराजे भोसले बोलतोय' चित्रपट रिलीज झाला. या चित्रपटाची निर्मिती एव्हरेस्ट एंटरटेन्मेट एलएलपी आणि महेश मांजरेकर यांनी संयुक्तपणे मेसर्स अश्वमी फिल्म्सच्या बॅनरखाली केली होती. यात कंपनीकडे 60 टक्के आणि महेश मांजरेकर यांच्याकडे 40 टक्के हक्क होते. मात्र 2013 मध्ये महेश मांजरेकर यांनी 40% हक्क एव्हरेस्ट एंटरटेन्मेटला दिले. त्यामुळे कंपनी चित्रपटाशी संबंधित सर्व हक्कांची एकमेव मालक बनली. यात सीक्वलचे विशेष अधिकार किंवा हक्कांचा समावेश आहे. असा दावा कंपनीने याचिकेत केला आहे.

न्यायालयानेही याचिकेची दखल घेऊन चित्रपटाचे विशेष प्रदर्शन सोमवारी (ता. २०) आयोजित करण्याचे आदेश दिले. विशेष प्रदर्शनानंतरही चित्रपटाबाबत काही आक्षेप असल्यास कंपनीने त्याबद्दल न्यायालयाला सांगावे. 'पुन्हा शिवाजीराजे भोसले' चित्रपट 31 ऑक्टोबरला रिलीज होणार आहे.