Asha Bhosle Last Post: भारतीय संगीतविश्वातील दिग्गज आणि सदाबहार गायिका आशा भोसले यांचं आज (१२ एप्रिल) निधन झाल्याची दु:खद बातमी समोर आली आहे. वयाच्या ९२ व्या वर्षी त्यांनी मुंबईतील ब्रीच कॅन्डी रुग्णालयात अखेरचा श्वास घेतला. त्यांच्या निधनामुळे संपूर्ण मनोरंजन विश्वावर शोककळा पसरली आहे.

अनेक दशकं आपल्या सुरेल आवाजाने प्रेक्षकांच्या मनावर अधिराज्य गाजवणाऱ्या आशा भोसले यांनी संगीत क्षेत्रात अमूल्य योगदान दिलं. त्यांच्या गाण्यांनी अनेक पिढ्यांना मंत्रमुग्ध केलं आणि आजही त्यांचा आवाज रसिकांच्या मनात ताजा आहे.

दरम्यान, आशा भोसले यांच्या निधनानंतर त्यांच्या सोशल मीडियावरील अखेरच्या पोस्टची विशेष चर्चा रंगली आहे. १८ मार्च रोजी त्यांनी शेअर केलेल्या या पोस्टमध्ये त्यांनी ‘The Shadowy Light’ या गाण्याबद्दल आपले भावनिक विचार व्यक्त केले होते.

एक क्रिएटीव्ह पोस्ट शेअर करत त्यांनी कॅप्शनमध्ये लिहिले, ‘The Shadowy Light’ या गाण्याचा माझ्यासाठी अत्यंत गहन अर्थ आहे. वाराणसीला भेट देऊन, अत्यंत पवित्र अशा गंगा नदीच्या प्रवासात सहभागी होत आणि माझ्या नजरेस पडणाऱ्या दृश्यांचे बारकाईने निरीक्षण करत असतानाच मला जीवनाचा खरा अर्थ उमजला. मी कोण आहे आणि या पृथ्वीतलावर मला नक्की काय करायचे आहे, याची मला जाणीव झाली.

त्यांनी पुढे लिहीले, ‘The Shadowy Light’ या गाण्यामध्ये, या खोलवर वाहणाऱ्या नदीला पार करणे हे माझ्या जीवनप्रवासाचेच प्रतीक आहे. माझा जन्म, माझे नातेसंबंध, संगीताप्रती माझी निष्ठा, माझी कर्तृत्वे आणि एक कन्या, माता, भगिनी, पत्नी व एक हिंदू भारतीय म्हणून माझी कर्तव्ये या सर्वांचेच ते प्रतिनिधित्व करते. या जीवननदीला पार करून जाण्यासाठी मला मदत करणारा तो नावाडी म्हणजे माझे संगीत होय. तोच माझा मार्गदर्शक आहे. आणि जेव्हा मी नदीच्या दुसऱ्या तीरावर पोहोचेन, तेव्हा माझा हा जीवनप्रवास पूर्ण होईल. तेव्हा मला ‘मोक्ष’ (परम मुक्ती) प्राप्त होईल. ज्या अवस्थेत मी आपल्या सभोवताली सर्वत्र तरंगणाऱ्या हजारो नादांपैकीच एक नाद बनून जाईन.

त्यांनी शेवटी लिहीले, जर तुम्ही त्या नादांपैकी काहींना एकत्र गुंफले, तर त्यातून एक अत्यंत सुंदर सुरावट निर्माण होते. म्हणूनच, मी देखील त्या नादांपैकीच एक नाद बनेन. जो कालांतराने एका सुंदर गीतातील एक ‘सूर’ (संगीत-स्वर) बनेल आणि ते गीत पुढील हजारो वर्षांपर्यंत, अनेक पिढ्यांकडून ऐकले जाईल. निसर्गाशी एकरूप होण्याची ही जी मुक्ती आहे, तीच नदीच्या दुसऱ्या तीरावर माझी प्रतीक्षा करत आहे.” आशा भोसले

या पोस्टमध्ये त्यांनी जीवन, संगीत आणि अध्यात्म यांचा सुंदर संगम मांडला होता. वाराणसी आणि गंगा नदीच्या अनुभवातून जीवनाचा खरा अर्थ उमजल्याचं त्यांनी सांगितलं. जीवनप्रवास हा एका नदीसारखा असून, त्यातून पार होणं म्हणजेच आत्मिक प्रवास असल्याचं त्यांनी स्पष्ट केलं.“माझं संगीतच माझा मार्गदर्शक आहे,” असं म्हणत त्यांनी आपल्या आयुष्यातील प्रत्येक भूमिकेचा कन्या, माता, पत्नी आणि कलाकार अभिमान व्यक्त केला होता.