Oscar 2025 : आमिर खान निर्मित 'लापता लेडीज' हा चित्रपट ९७ व्या ऑस्कर पुरस्कारच्या शर्यतीतून बाहेर पडला आहे. अकादमी ऑफ मोशन पिक्चर आर्ट्स अँड सायन्सेस (AMPAS) ने बुधवारी सकाळी ही घोषणा केली. २०२४ साली भारतात सर्वाधिक पसंतीचा चित्रपट ठरलेल्या या चित्रपटाला शेवटच्या १५ चित्रपटांच्या यादीतही स्थान मिळाले नाही. या बातमीनंतर भारतीय चाहते थोडे निराश झाले आहेत.

'लापता लेडीज' हा चित्रपट ऑस्कर पुरस्कारच्या शर्यतीतून बाहेर पडला असला तरी 'संतोष' हा चित्रपट शेवटच्या १५ चित्रपटांच्या यादीत स्थान मिळवण्यात यशस्वी झाला. संतोष हा चित्रपट ब्रिटीश-भारतीय दिग्दर्शक संध्या यांनी दिग्दर्शन केले आहे. ब्रिटिश अकादमीने ऑस्करच्या आंतरराष्ट्रीय फीचर फिल्म श्रेणीसाठी यूकेकडून संतोष हा चित्रपट पाठवला होता. हा चित्रपट हिंदी भाषेत चित्रीत केलेला आहे. यात शहाना गोस्वामी मुख्य भूमिकेत आहे. सुनीता राजवार, संजय बिश्नोई, कुशल दुबे आणि इतर कलाकारांनी या सिनेमात सहायक भूमिका केल्या आहेत.

‘अनुजा’ झाली शॉर्टलिस्ट

‘लापता लेडीज’ ऑस्करच्या शर्यतीतून बाहेर पडला असला तरी गुनीत मोंगा कपूर निर्मित लाइव्ह-ॲक्शन शॉर्ट फिल्म ‘अनुजा’ शॉर्टलिस्ट झाली आहे. ही शॉर्ट फिल्म वस्त्रोद्योगातील बालमजुरीच्या समस्येवर भाष्य करते. यामध्ये नागेश भोसलेसह अनेक कलाकार आहेत.

ऑस्कर पुरस्कार सोहळा २ मार्चला

‘लपता लेडीज’ हा चित्रपट परदेशी श्रेणीतील पुरस्कारासाठी पाठवण्यात आला होता. २३ सप्टेंबर रोजी, फिल्म फेडरेशन ऑफ इंडियाने ऑस्कर २०२५ साठी या चित्रपटाला पाठवण्याची घोषणा केली होती. ऑस्कर पुरस्कारासाठीची नामांकने १७ जानेवारीला जाहीर होणार आहेत. त्याचबरोबर ऑस्कर पुरस्कार सोहळा २ मार्चला होणार आहे.

आत्तापर्यंत भारतातून 'मदर इंडिया', 'सलाम बॉम्बे' आणि 'लगान' या तीन चित्रपटांना ऑस्करच्या परदेशी चित्रपट श्रेणीत नामांकन मिळाले आहे, मात्र एकाही चित्रपटाला पुरस्कार मिळू शकला नाही. 'लापता लेडीज'च्या नॉमिनेशननंतर लोकांना वाटले होते की, यावेळी हा पुरस्कार भारतात येईल, पण यावेळीही त्यांना ऑस्करची वाट पाहावी लागणार.