Ghabadkund Collection: मराठी चित्रपटसृष्टीतील रहस्य, थरार आणि भयाचा अनोखा संगम असलेल्या 'घबाडकुंड' या चित्रपटाने बॉक्स ऑफिसवर दमदार कामगिरी करत प्रेक्षकांची मनं जिंकली आहेत. मराठी, हिंदी आणि हॉलिवूडमधील अनेक मोठ्या चित्रपटांच्या स्पर्धेतही या चित्रपटाने स्वतःचं वेगळं स्थान निर्माण केलं असून, दुसऱ्या आठवड्याच्या अखेरीस तब्बल ८.१० कोटी रुपयांची कमाई करत यशाचा नवा टप्पा गाठला आहे.

'राजा शिवाजी', 'तुंबाडची मंजुळा' आणि 'देऊळ बंद' या मराठी चित्रपटांसह बॉलिवूडमधील 'कॉकटेल', 'में वापस आऊंगा', 'वेलकम टू द जंगल' तसेच हॉलिवूडमधील 'द ओडिसी', 'स्पायडर-मॅन' आणि 'ऑब्सेशन' यांसारख्या बहुचर्चित चित्रपटांची स्पर्धा असतानाही 'घबाडकुंड'ने आपल्या वेगळ्या कथानकाच्या आणि उत्कंठावर्धक मांडणीच्या जोरावर प्रेक्षकांची विशेष पसंती मिळवली आहे.

चित्रपटातील रहस्यपूर्ण कथा, प्रभावी दिग्दर्शन, कलाकारांचा दमदार अभिनय, लक्षवेधी संवाद, पार्श्वसंगीत आणि उत्कृष्ट तांत्रिक बाजू यामुळे प्रेक्षकांकडून चित्रपटाचे भरभरून कौतुक होत आहे. सोशल मीडियावरही 'घबाडकुंड'ची मोठ्या प्रमाणात चर्चा सुरू असून, प्रेक्षकांकडून मिळणाऱ्या सकारात्मक प्रतिक्रिया आणि 'वर्ड ऑफ माऊथ'चा चित्रपटाला मोठा फायदा होताना दिसत आहे.

देवदत्त नागे, कुशल बद्रिके, संदीप पाठक, शशांक शेंडे, प्राजक्ता हनमघर, स्मिता पायगुडे-अंजुटे, वैष्णवी कल्याणकर, रॉकी देशमुख, आरोही भोईर, योगेश प्रकाश तनपुरे, साहिल अनलदेवर आदी कलाकारांची दमदार फौज ‘घबाडकुंड’ चित्रपटात आहे. विविध तिकीट बुकिंग प्लॅटफॉर्मवरही चित्रपटाला उत्कृष्ट रेटिंग मिळत असून, त्यामुळे नव्या प्रेक्षकांची उत्सुकता दिवसेंदिवस वाढत आहे.