Raju Srivastava Health Update |मुंबई : प्रसिद्ध कॉमेडीयन राजू श्रीवास्तवची प्रकृती चिंताजनक आहे. राजू श्रीवास्तवर(Raju Srivastava) दिल्लीच्या एम्स रूग्णालयामध्ये उपचार सुरू आहेत. राजूचे निकटवर्तीय आणि हितचिंतक त्याची प्रकृती सुधारण्यासाठी प्रार्थना करत आहेत. राजूचे चाहते त्याच्या तब्येतीचे अपडेट जाणून घेण्याचा सतत प्रयत्न करत असतात. नुकताच राजू श्रीवास्तवचा एमआरआय रिपोर्ट(MRI Report) आला आहे. या रिपोर्टमध्ये राजूच्या मेंदूच्या नसा दाबल्यामुळे त्याच्या मेंदूला ऑक्सिजन पोहोचत नसल्याचे नमूद केले आहे.

बुधवारी म्हणजेच १० ऑग्स्ट रोजी व्यायाम करताना राजू श्रीवास्तवला हृदयविकाराचा झटका आला. त्याची प्रकृती बिघडल्याने त्याला तातडीने एम्स रूग्णालयामध्ये दाखल करण्यात आले होते. जेथे आता राजू लाईफ सपोर्ट सिस्टीम म्हणजेच व्हेंटिलेटरवर आहे. मधल्या काळात राजूने बोट हलवल्याची बातमी आली होती. वृत्तानुसार, राजूच्या प्रकृतीत विशेष सुधारणा नसल्याचे सांगितले जात आहे.

एका वृत्तानुसार, राजू श्रीवास्तवचा भाऊ दीपूने सांगितले की, एमआरआय रिपोर्टमध्ये तणावामुळे राजूच्या मेंदूतील काही मज्जातंतू दाबल्या गेल्याचे समोर आले आहे. त्यामुळे राजूच्या मेंदूपर्यंत ऑक्सिजनचा पुरवठा होत नाही. रिपोर्टनुसार, डॉक्टरांनी सांगितले की, राजूला बरे होण्यासाठी अजून १० दिवस लागू शकतात.

राजू श्रीवास्तवच्या प्रकृतीबाबत सोशल मीडियावर अनेक प्रकारच्या अफवा उडत आहेत. त्यांच्या कुटुंबीयांनी सोशल मीडिया हँडलवर एक निवेदन जारी केले आहे. या निवेदनामध्ये राजू श्रीवास्तवच्या कुटुंबीयांनी लोकांना विनंती केली आहे की त्यांनी कोणत्याही चुकीच्या अफवा पसरवू नये, त्याचबरोबर राजूला लवकरात लवकर बरे वाटावे म्हणून प्रार्थना करण्याची विनंती केली आहे