'ये रे ये रे पैसा' (Yere Yere Paisa 3 ) या चित्रपटाने बॉक्स ऑफिस गाजल्यानंतर आता 'ये रे ये रे पैसा ३' हा सिनेमा चित्रपटगृहांत धुमाकूळ घालणार आहे. आज दसऱ्याच्या शुभ मुहूर्तावर चित्रपटाच्या प्रदर्शनाची तारीख जाहीर करण्यात आली आहे. हा चित्रपट 3 जानेवारी 2025 रोजी प्रेक्षकांच्या भेटीला येणार आहे.

'ये रे ये रे पैसा ३' या दमदार चित्रपटाच्या दिग्दर्शनाची धुरा संजय जाधव (Sanjay jadhav) यांनी सांभाळली आहे. चित्रपटाचे संवाद लेखन अरविंद जगताप यांनी केलं आहे. या चित्रपटात गायिका वैशाली सामंत हीने देखील आपल्या आवाजाने चित्रपटाचा दर्जा वाढवला आहे. 'ये रे ये रे पैसा ३' मध्ये तगडी स्टारकास्ट पाहायला मिळत आहे. या चित्रपटात संजय नार्वेकर, सिद्धार्थ जाधव, विशाखा सुभेदार, उमेश कामत, तेजस्विनी पंडित, आनंद इंगळे, नागेश भोसले, वनिता खरात, जयवंत वाडकर हे कलाकार पाहायला मिळत आहे.

संजय जाधव कायमच प्रेक्षकांसाठी मनोरंजनाची भन्नाट मेजवानी घेऊन येतात. त्यांच्या 'ये रे ये रे पैसा'चित्रपटाने देखील चाहत्यांना खूप आनंद दिला होता. पैसा मिळवण्याची धमाल गोष्ट येथे आपल्याला पाहायला मिळणार आहे. या चित्रपटात अभिनयाची जुगलबंदी पाहता येणार आहे. नव्या वर्षात मनोरंजनाचा धमाका पाहायला मिळणार आहे.