अभिनेत्री हेलन यांचं ‘मेरा नाम चिन चिन चु’हे गाणं तुम्हाला माहित असेल. तसंच अलिकडच्या वर्षांमधल्या फिल्म मग 'दबंग'मधलं मुन्नी बदमान हूई, 'पुष्पा'मधलं 'उ आंटे', संजय लीला भन्सालींच्या' रामलीला' मधलं प्रियांका चोप्राचं ‘राम चाहे लीला’,ही सगळी आणि अशी अनेक आयटम साँग्स प्रेक्षकांच्या चांगलीच लक्षात आहेत. गेल्या दोन दशकांमध्ये तर आयटम साँग्सचा फॉर्म्युला जवळजवळ प्रत्येक चित्रपटांमध्ये वापरला जात आहे.

बॉलिवूड चित्रपटांमध्ये उडत्या चालीच्या, सेनसेशलन गाण्यांवर अभिनेत्री, आयटम गर्ल्सनी धरलेला ठेका पाहून सिनेप्रेमींना भुरळ पडली नाही तर नवलच. असे अनेक चित्रपट आहेत ज्यांचं कथानक, कलाकारांचा अभिनय आणि दिग्दर्शन अत्यंत साधारण, सुमार दर्जाचं असूनही केवळ त्यातल्या आयटम नंबरमुळं ते लक्षात राहिलेत.आयटम साँग हिट म्हणजे चित्रपट हिट असा समजही यामुळं निर्माण होऊ लागला.

अभिनेत्री श्रद्धा कपूर आणि राजकुमार राव यांच्या 'स्त्री 2' मधलं 'आज कि रात मजा हुस्न का' हे आयटम साँग सध्या चर्चेत आहे. मॅडॉक फिल्मची निर्मिती असलेल्या आणि अमर कौशिक दिग्दर्शित हॉरर कॉमेडी 'स्त्री 2' बॉक्सऑफिसवर आतापर्यंतचा सर्वात मोठा ओपनर ठरला. पण तमन्नाच्या 'आज कि रात'नं एक नवी मुड तयार केला आहे. दिग्दर्शक अमर कौशिकनं या हिट आयटम ट्रॅकवर आपलं मत मांडलं आहे.

केवळ सिनेमात तडका म्हणून नाही तर 'स्त्री 2'च्या स्टोरीलाईनला साजेसं आयटम साँग असल्याचं तो म्हणतो. 'आज कि रात'या गाण्याचं बोलही सिनेमाच्या कथेमध्ये चपखल बसलेत असं अमर आवर्जून सांगतो. आयटम साँग मादक, मसालेदार असू शकते पण त्याचबरोबर त्यात विचारशीलताही वाव असू शकतो. 'आज कि रात' हेच देण्याचा आपला प्रयत्न असल्याचं अमर म्हणतो. तर मग दिग्दर्शक अमर कौशिकनं हेही सांगावं की नक्की कोणता संदेश या गाण्यातून तो देऊ पाहतोय.