Janhvi Kapoor: बॉलिवूड अभिनेत्री जान्हवी कपूरच्या नावाचा, फोटोचा आणि ओळखीचा अनधिकृत वापर केल्याप्रकरणी दिल्ली उच्च न्यायालयाने महत्त्वपूर्ण आदेश दिला आहे. इंटरनेटवर जान्हवीशी संबंधित अश्लील आणि अत्यंत आक्षेपार्ह फोटो, व्हिडिओ आणि मिम्स तातडीने हटवण्याचे निर्देश न्यायालयाने दिले आहेत. मात्र, अभिनेत्रीच्या परवानगीशिवाय चालवली जाणारी सर्व फॅन पेजेस किंवा इतर ऑनलाइन कंटेन्ट सरसकट ब्लॉक करण्याची मागणी न्यायालयाने फेटाळून लावली.

जान्हवी कपूरने आपल्या व्यक्तिमत्त्व अधिकारांचे संरक्षण करण्यासाठी दिल्ली उच्च न्यायालयात याचिका दाखल केली होती. तिचे फोटो आणि ओळख व्यावसायिक फायद्यासाठी वापरणाऱ्या सोशल मीडिया प्लॅटफॉर्म्ससह ५,००० हून अधिक वेबपेजेस आणि पोस्ट्सवर कारवाई करण्याची मागणी याचिकेत करण्यात आली होती. न्यायमूर्ती अनुप जयराम भंभानी यांच्या खंडपीठासमोर या प्रकरणाची सुनावणी झाली.

न्यायालयाने अश्लील किंवा अत्यंत आक्षेपार्ह कंटेन्टपासून संरक्षण मिळण्याचा जान्हवीचा अधिकार मान्य केला. मात्र, तातडीने कोणत्या कंटेन्टवर कारवाई करायची, याबाबत स्पष्टता आवश्यक असल्याचे न्यायालयाने म्हटले. त्यामुळे अश्लील किंवा अत्यंत आक्षेपार्ह कंटेन्ट असलेल्या वेबपेजेसची अचूक यादी तयार करण्याचे निर्देश अभिनेत्रीच्या वकिलांना देण्यात आले.

फॅन पेजेस ब्लॉक करण्यास नकार

जान्हवीच्या नावाने चालणारी सर्व फॅन पेजेस हटवण्याची मागणी मात्र न्यायालयाने मान्य केली नाही. फॅन पेजेसवर कलाकाराचे कौतुक, टीका किंवा थट्टा केली जाऊ शकते आणि हे अभिव्यक्ती स्वातंत्र्याचा भाग असल्याचे न्यायालयाने स्पष्ट केले.

“आम्ही देशाचे नैतिक रक्षक नाही,” असे निरीक्षण न्यायमूर्ती भंभानी यांनी नोंदवले. सार्वजनिक व्यक्तिमत्त्व असल्याने एखाद्या व्यक्तीवर विविध प्रकारच्या प्रतिक्रिया येणे स्वाभाविक आहे, असेही न्यायालयाने स्पष्ट केले. प्रत्येक फॅन क्लब किंवा फॅन पेज बंद करता येणार नाही, असे न्यायालयाने म्हटले. या प्रकरणाची पुढील सुनावणी १७ ऑगस्ट रोजी होणार आहे.