कॉमेडियन झाकीर खान (Zakir Khan) सध्या कोणत्या ना कोणत्या कारणामुळे चर्चेत आहे. मात्र आता झाकीर खान रुग्णालयात दाखल असल्याची माहिती समोर आली आहे. झाकीर खान सध्या मुंबईतील लीलावती रुग्णालयात दाखल आहे. त्याचे फोटो आणि व्हिडीओ सोशल मीडियावर तुफान व्हायरल होत आहेत. झाकीर खानचा भाऊ अरबाज खानने नुकत्याच त्याच्या व्हलॉगमध्ये झाकीर खानची झलक दाखवली आहे.

झाकीर खान रुग्णालयात दाखल असल्याचे समजताच चाहत्यांनी चिंता व्यक्त केली आहे. अरबाज खानने शेअर केलेल्या व्हिडीओत जाकिर खान रुग्णालयात दिसत आहे. रुग्णालयात सर्वजण टी-२० विश्वचषक फायनल पाहताना दिसत आहे. झाकीर मॅचचा आनंद घेत आहे. या व्हिडीओवर नेटकरी भरभरून कमेंट्स करत आहेत. एका युजरने विचारले की, "झाकीर खान, तू ठीक आहेस ना? तुझे हेल्थ अपडेट सांगत जा", दुसऱ्या युजरने लिहिलं की, "लवकर बरा हो झाकीर भाई..."

अरबाज खानच्या रमझान व्हलॉगमध्ये झाकीर खान दिसला. रुग्णालयात फाईव्ह स्टार हॉटेलसारख्या एका रुममध्ये झाकीर खान होता. त्यांच्यासोबत आयपीएस अधिकारी मनोज कुमार शर्मा आणि त्यांची पत्नी श्रद्धा देखील होती. झाकीर खान त्याच्यासोबत हसत-खळत गप्पा मारताना दिसला. जाकिर खानच्या हेल्थ बाबत सोशल मीडियावर उलट-सुलट चर्चा सुरू झाल्या असता, त्याने सांगितले की, "तब्येत थोडी खराब आहे, जास्त खराब नाही...तुम्ही जे इंटरनेटवर वाचत आहात त्या सर्व अफवा आहेत..."

झाकीर खानने घेतला ब्रेक

अलिकडेच झाकीर खानने स्टँड-अप कॉमेडीपासून ब्रेक घेतल्याची घोषणा केली. ज्यामुळे चाहते खूप नाराज झाले. तसेच चिंतेत पडले. त्यानंतर झाकीरने त्याच्या तब्येतीमुळे असे पाऊल उचलल्याचे सांगितले. झाकीर खानने 'गल्फ न्यूज'शी बोलताना सांगितले की, "माझ्या कुटुंबात काही अनुवांशिक आजार आहेत, जे एका वयानंतर उद्भवतात. गेल्या काही वेळापासून मला खूप त्रास झाला आहे. त्यामुळे आता मला विश्रांतीची गरज आहे..."