Bhau Kadam: मराठी मनोरंजनविश्वातील लोकप्रिय विनोदी अभिनेता भाऊ कदम सध्या त्यांच्या वैयक्तिक आयुष्यामुळे चर्चेत आले आहेत. ‘चला हवा येऊ द्या’ या गाजलेल्या कार्यक्रमातून घराघरात पोहोचलेल्या भाऊ कदम यांनी नुकतीच त्यांच्या प्रेमकथेचा खुलासा केला असून, त्यांची ही साधी पण इमोशनल लव्हस्टोरीने चाहत्यांना फार आवडली आहे.

सागर खापरेच्या पॉडकास्टमध्ये भाऊ कदम यांनी सांगितले की, आमच्या प्रेमाची सुरुवात अगदी वेगळ्या पद्धतीने झाली. माझं लव्हमॅरेज आहे. माझ्या बायकोची बहीण आमच्या एकांकिकेत काम करायची. आमचा संपूर्ण ग्रुप एकदा त्यांच्या घरी गेला होता, मी सुद्धा त्यांच्याबरोबर गेलो होतो. हळुहळू माझं जाणं-येणं वाढलं. ममताची आणि माझी ओळख आणि भेट तिथेच झाली. ममता घरातील मोठी बहीण होती.आमचं हळूहळू छान जुळलं. आम्ही एकमेकांना ओळखून घेतलं. 

भाऊ कदम पुढे म्हणाले, 'मग एकदिवस मी मनातल्या भावना कबूल करायचं ठरवलं. 'हो' म्हणाली तर चांगलंच आहे, असा विचार माझ्या मनात होता आणि खरंच ती हो म्हणाली. तिने माझं घर आणि परिस्थिती बघितली नव्हती. त्याआधीच तिने होकार दिला आणि मग आमचं लग्न झालं.' 

आज भाऊ कदम हे मराठी इंडस्ट्रीतील एक यशस्वी नाव असले तरी त्यांच्या आयुष्यातील ही प्रेमकहाणी त्यांच्या साध्या व्यक्तिमत्त्वाची झलक दाखवते. त्यांनी ‘चला हवा येऊ द्या’ सह त्यांनी 'पांडू', 'टाईमपास', 'इन्स्पेक्टर झेंडे' यांसारख्या चित्रपटांमध्ये काम करुन प्रेक्षकांच्या मनात आपलं स्थान निर्माण केलं आहे.