Zaira Wasim On Suhani Bhatnagar Death Case:

बॉलिवूडचा मिस्टर परफेक्शनिस्ट आमिर खानचा (Aamir Khan) सुपरहिट चित्रपट दंगलमध्ये ज्युनिअर बबीता फोगटची भूमिका साकारणारी सुहानी भटनागरचा (Suhami Bhatnagar) दुर्दैवी मृत्यू झाला. सुहानीच्या मृत्यूमुळे संपूर्ण बॉलिवूड इंडस्ट्रीसह तिच्या चाहत्यांना मोठा धक्का बसला आहे. अजूनही कोणालाही विश्वास बसत नाहीये ही सुहानी या जगामध्ये नाहीये. १९ वर्षांच्या सुहानीला डरमेटोमायसाइटिस नावाचा आजार झाला होता.

सुहानी भटनागरच्या अचानक निधनामुळे दंगल चित्रपटाच्या संपूर्ण टीमलाच मोठा धक्का बसला आहे. अशामध्ये सुहानीची दंगल चित्रपटातील ऑनस्क्रीन बहीण अर्थात झायरा वसीमने (Zaira Wasim) दु:ख व्यक्त केले. झायराने या चित्रपटामध्ये बबीताची मोठी बहीण अर्थात गीता फोगाटची भूमिका साकारली होती. आपल्या सहकलाकाराचा मृत्यू झाल्यामुळे झायराला मोठा धक्का बसला आहे.

झायरा वसीमने सोशल मीडियावर एक पोस्ट शेअर करून सुहानीच्या निधनावर दु:ख व्यक्त केले आहे. झायराने लिहिले की, 'सुहानी भटनागरच्या निधनाने मला इतका मोठा धक्का बसला आहे की मी ते शब्दात व्यक्त करू शकत नाही. या कठीण काळात मी तिच्या कुटुंबाप्रती शोक व्यक्त करते. तिचे आई-वडील कोणत्या परिस्थितीतून जात असतील या विचाराने माझे मला खूप दुख: होत आहे. मी नि:शब्द आहे.'

झायरा वसीम सुहानीच्या निधनाच्या धक्क्यातून सावरू शकलेली नाही. ही बातमी फक्त एक अफवा असावी असे तिला वाटत आहे. टाईम्स ऑफ इंडियाशी बोलताना झायरा म्हणाली की, 'मी नुकतेच याबद्दल वाचले आणि माझा यावर विश्वास बसत नाही. मला असे वाटते की ती फक्त एक अफवा असावी. माझी इच्छा आहे की ते वृत्त खोटे असावे. हे ऐकल्यापासून माझ्या मनात तिच्यासोबतच्या क्षणांचे फ्लॅशबॅक झाले. ती खूप छान व्यक्ती होती आणि आमच्या खूप गोड आठवणी होत्या. तिच्या आई-वडिलांना काय त्रास होत असेल याची मी कल्पनाही करू शकत नाही. त्यांना या दु:खातून सावरण्यासाठी शक्ती मिळो अशी मी प्रार्थना करतो.'