मुंबई: भारतरत्न आणि भारताच्या सूर सम्राज्ञी म्हणून प्रसिद्ध असलेल्या लता मंगेशकर यांचं आज मुंबईमध्ये निधन झालं आहे. वयाच्या 92 वर्षी त्यांनी अखेरचा श्वास घेतला. ब्रीच कँडी रुग्णालयात त्यांच्यावर उपचार सुरू असतानाच त्यांची प्राणज्योत मालवली. लता मंगेशकर (Lata Mangeshkar) यांच्या निधनामुळे संपूर्ण जगावर शोककळा पसरली आहे. आज रविवारी सकाळी 9.30 वाजण्याच्या सुमारास त्यांनी अखेरचा श्वास घेतला. देशभरातून त्यांना श्रद्धांजली वाहण्यात येत आहे. रातकीय, सामाजीक, सांस्कृतीक, संगीत क्षेत्रातून दु:ख व्यक्त केले जात आहे. त्यात आता बॉलिवूडमधील सर्व दिग्गज सेलिब्रिटी सोशल मीडियावर त्यांना श्रद्धांजली वाहत आहेत. यात अक्षय कुमार, भूमी पेडणेकर आणि दिया मिर्झा यांसारख्या सेलिब्रिटींनी ट्विट करून शोक व्यक्त केला आहे.

भारतरत्न लता मंगेशकर (Lata Mangeshkar) यांच्यावर शासकीय इतमामात अंत्यसंस्कार करण्याच्या सूचना मुख्यमंत्री उद्धव ठाकरे (Uddhav Thackeray) यांनी दिल्या आहेत. आज सायंकाळी 6.30 वाजता शिवाजी पार्कवर त्यांच्यावर अंत्यसंस्कार होणार आहेत. प्रभू कुंज या त्यांच्या निवासस्थानी त्यांचं पार्थीव अंतिम दर्शनासाठी ठेवलं जाणार आहे.