मुंबई: सुष्मिता सेनची 'आर्या' ही वेबसीरीज प्रेक्षकांच्या पसंतीस उतरली होती. या वेबसीरीजचे आत्तापर्यंत दोन सीझन प्रदर्शित झाले आहेत. सुष्मिता सेन आणखी एका वेबसीरीजमध्ये दिसणार आहे. तिची ही आगामी वेबसीरीज ट्रान्सजेंडर अॅक्टिविस्ट गौरी सावंतवर आधारित आहे. या वेबसीरीजमध्ये सुष्मिता गौरी सावंत यांची भूमिका साकारणार आहे.

पीपिंगमूनच्या वृत्तानुसार, निर्मात्यांनी ट्रान्स अॅक्टिविस्ट गौरी सावंत यांच्या जीवनावर आधारित वेबसीरीजमधील भूमिकेसाठी सुष्मिताला विचारले होते. ही भूमिका साकारण्यासाठी ती तयार आहे. सुष्मिताला वेबसीरीजची स्क्रिप्ट आवडली असून, ही भूमिका करण्यासाठी सुष्मिता खूप उत्सुक असल्याचे सांगण्यात येत आहे. तिला तिच्या आर्या या व्यक्तिरेखेतून बाहेर पडून काहीतरी नवीन आणि वेगळे करण्याचा प्रयत्न करायचा आहे. तिला गौरीचे पात्र खूप आवडले आहे.

या वेबसीरीजवर काम सुरू झाले आहे. या वेबसीरीजचे दिग्दर्शन रवी जाधव करणार आहेत. ही वेबसीरीज वूट सिलेक्टवर रिलीज होणार असल्याचे म्हटले जात आहे. ग्लोबल स्पोर्ट्स एंटरटेन्मेंट आणि मीडिया सोल्युशन्सच्या बॅनरखाली अर्जुन सिंग बारान आणि कार्तिक डी निशंदर या वेबसीरीजची निर्मिती करणार आहेत. या सीरीजमध्ये सहा एपिसोड असणार आहेत. या वेबसीरीजच्या माध्यमातून गौरी सावंत यांच्या जीवनातील पैलू उलगडणार आहेत.

या वेबसीरीजचे टायटल अजून निश्चित झालेले नाही. टायटल निश्चित झाल्यावर निर्माते इतर कलाकार आणि प्रदर्शनाची तारीख जाहीर करणार आहेत. नोव्हेंबरच्या शेवटच्या आठवड्यापर्यंत या वेबसीरीजची चित्रीकरण पूर्ण होईल, असे सांगण्यात आले आहे.