संजय गडदे, मुंबई

Mumbai News: बॉलिवूडची (Bollywood) ड्रामा क्वीन अर्थात अभिनेत्री राखी सावंतच्या (Actress Rakhi Sawant) भावाला अटक करण्यात आली आहे. चेक बाउन्स प्रकरणी राकेश अनंत सावंत (Rakesh Sawant) याला ओशिवरा पोलिसांनी (Oshiwara Police Station) अटक केली आहे. अटकेनंतर राकेशला न्यायालयात हजर करण्यात आले. कोर्टाने त्याला 22 मेपर्यंत न्यायालयीन कोठडी सुनावली आहे.

मिळालेल्या माहितीनुसार, चेक बाऊन्स प्रकरणी राकेश सावंत अटक करण्यात आली आहे. तीन वर्षांपूर्वी व्यावसायिकाच्या तक्रारीवरून कोर्ट केस क्रमांक 96/ss/2021 कलम 138 अ जामीन पात्र वॉरंटवर राकेश सावंतला पोलिसांकडून अटक करण्यात आली आहे. न्यायालयाने याप्रकरणाच्या सुनावणी दरम्यान राकेशला पैसे परत करण्याच्या अटीवर जामीन मंजूर केला होता.

न्यायालयाने आदेश देऊन देखील राकेश सावंतने व्यावसायिकाला पैसे परत केले नाही. त्यामुळे न्यायालयाने त्याच्याविरोधात अटक वॉरंट काढले. त्यानंतर रविवारी रात्री ओशिवरा पोलिसांनी राकेश सावंत याला अटक केली. अटकेनंतर त्याला न्यायालयात हजर करण्यात आले. तर न्यायालयाने त्याला 22 मेपर्यंत न्यायालयीन कोठडी सुनावली आहे.

यापूर्वी देखील एका प्रकरणी राकेश सावंतला पोलिसांनी अटक केली होती. टीव्ही मालिकेत काम करणारी अभिनेत्री ऋतू खन्नाची छेड काढल्याप्रकरणी त्याच्याविरोधात पोलिसांनी कारवाई करत अटक केली होती. याप्रकरणी अटकेनंतर काही तासांतच राकेशची जामिनावर सुटका करण्यात आली होती. याप्रकरणात सुटका झाल्यानंतर राकेशने स्वत:ला निर्दोष असल्याचा दावा केला होता.