Mirzapur Fame Shahnawaz Pradhan: टेलिव्हिजनवरील अनेक भूमिका गाजवणारे अभिनेते शाहनवाज प्रधान (Shahnawaz Pradhan) यांचे निधन झाले आहे. वयाच्या 56 व्या वर्षी त्यांनी अखेरचा श्वास घेतला. मिळालेल्या माहितीनुसार, शाहनवाज एका कार्यक्रमासाठी गेले असताना अचानक त्यांच्या छातीत दुखू लागले. त्यानंतर लगेचच त्यांना मुंबईतील एका रुग्णालयात दाखल करण्यात आले आहे. पण डॉक्टरांनी त्यांना मृत घोषित केले.

मिर्झापूर या प्रसिद्ध वेब सीरिजमध्ये 'गुड्डू भैय्या' म्हणजेच अली फजलच्या सासऱ्याची भूमिका अभिनेता शाहनवाज प्रधान यांनी साकारली होती. सहकलाकार राजेश तैलंगने सोशल मीडियावर या वृत्ताला दुजोरा दिला आहे. यासोबतच प्रतिमा काझमीसारख्या अनेक कलाकारांनीही सोशल मीडियावर शाहनवाज यांना श्रद्धांजली वाहिली आहे.

शाहनवाज यांनी गुड्डू भैय्याच्या सासऱ्याची भूमिका साकारल्यानंतर बरीच चर्चा होत होती. शाहनवाज प्रधान यांचा जन्म 6 डिसेंबर 1963 रोजी एका मध्यमवर्गीय कुटुंबात झाला. शाळेत असतानाच शाहनवाज यांना अभिनयात रस होता. त्यानंतर कॉलेजमध्ये असताना त्यांनी एक थिएटर ग्रुप देखील जॉईंट केला होता. शाहनवाज यांनी 1991 साली सिनेसृष्टीत करियर घडवायचं म्हणून मुंबई गाठली. जेव्हा आपल्या करियरची सुरुवात केली तेव्हा त्यांनी दुरदर्शनवरील शो श्री कृष्ण या मालिकेत नंदची भूमिका साकारली होती.

त्यानंतर अलिफ लैला या मालिकेत देखील मुख्य भूमिका साकराली होती. आपल्या सिने कारकिर्दित शाहनवाज यांनी अनेक मालिकेत आणि अनेक चित्रपटांत मुख्य भूमिका साकरल्या आहेत. ओटीटीवर सर्वाधिक चालणाऱ्या 'मिर्झापूर १ आणि २' या वेबसीरिजमध्येही त्यांनी मुख्य भूमिका साकारली होती.सोबतच रईस, खुदा हाफिज , द फॅमिली मॅन या कलाकृतीत ही त्यांनी काम केले आहे. सोबतच लवकरच 'मिर्झापूर ३' मध्ये ही शाहनवाज दिसणार आहे.