प्रसिद्ध अभिनेता राजपाल यादवला एक चूक महागात पडली आहे. दिल्ली हायकोर्टाने २ फेब्रुवारी रोजी अभिनेता राजपाल यादवला चेक बाऊन्स प्रकरणात तुरुंगात सरेंडर होण्याचे आदेश दिले होते. त्यानंतर आज गुरुवारी राजपालने तिहार जेलच्या सुपरिटेंडेंटसमोर आत्मसमर्पण केलं. राजपालने एका याचिका दाखल करून काही दिवसांची सूट मागितली होती. परंतु ४ फेब्रुवारी रोजी झालेल्या सुनावणीत कोर्टाने राजपालला दिलासा मिळाला नाही. त्यानंतर राजपाल यादवने तुरुंगात जाऊन सरेंडर केलं.

राजपाल यादव दिल्लीच्या हायकोर्टात सुनावणीदरम्यान हजर राहिला होता. त्यावेळी राजपाल यादव २५ लाखांचा चेक घेऊन आला होता. ५ कोटींमधील उर्वरित पैसे लवकरच परत करेल. त्यामुळे दिलासा देण्याची मागणी राजपालने केली. परंतु कोर्टाने राजपालला सरेंडर होण्याची आदेश दिले होते.

कोर्टाने म्हटलं होतं की, 'जे लोक कायद्याचा सन्मान करत नाहीत. त्यांना कोणतीही दया दाखवता कामा नये. कायद्याचं पालन करणाऱ्याला कोर्ट दिलासा देतं. त्याचा अवमान करणाऱ्यांना नाही'.

काय आहे संपूर्ण प्रकरण?

राजपाल यादवचं संपूर्ण प्रकरण २०१० सालात घडलेलं प्रकरण आहे. राजपालने डेब्यू फिल्म 'अता पता लापता' यासाठी मुरली प्रोजेक्ट प्रायव्हेट लिमिटेड नावाच्या कंपनीकडून ५ कोटींचं कर्ज घेतलं होतं. परंतु राजपालने घेतलेलं कर्ज फेडलं नाही. अनेकदा कर्ज फेडण्यासाठी दिलेले चेक बाऊन्स झाले. त्यानंतर कंपनीने अभिनेता राजपाल यादवच्या विरोधात कोर्टात धाव घेतली.

राजपाल चेक बाउन्स प्रकरणात दोषी आढळला. ट्रायल कोर्टाने या प्रकरणात राजपाल यादवला ६ महिन्यांची शिक्षा ठोठावली होती. परंतु राजपालने कोर्टात २०२४ साली दाद मागितल्यानंतर शिक्षेला स्थगिती दिली होती. यावेळी राजपालने तक्रारकर्त्याला पैसे देण्याचे मान्य केले होते. परंतु राजपालने पैसे कंपनीला दिले नाही. त्यानंतर दिल्ली हायकोर्टाने राजपाल यादवला सरेंडर होण्याचे आदेश दिले होते. त्यानंतर राजपाल तुरुंगात जाऊन सरेंडर झाला.