Aditya Pancholi Case: बॉलिवूड अभिनेता आदित्य पंचोली यांच्याविरोधात दाखल असलेल्या बलात्कार प्रकरणातील एफआयआर रद्द करण्यासाठी त्याने दाखल केलेल्या याचिकेवर आज मुंबई उच्च न्यायालयात 28व्यांदा सुनावणी पार पडली. हे प्रकरण गेल्या अनेक वर्षांपासून न्यायालयात प्रलंबित असून, वारंवार तारखा पुढे जात असल्याने या खटल्याकडे संपूर्ण मनोरंजनसृष्टीचे लक्ष लागून आहे.

आज झालेल्या सुनावणीनंतर माध्यमांशी बोलताना आदित्य पंचोली म्हणाला की, 'हा मामला रद्द होण्याच्या मार्गावर आहे. हा मामला न्यायालयात प्रलंबित असल्यामुळे यावर अधिक काही बोलू शकत नाही आणि पुढे काय होईल ते 4 मार्च रोजी समजेल.

या प्रकरणात फिर्यादीकडून दाखल करण्यात आलेल्या आरोपांवरून आदित्य पंचोली याच्याविरोधात बलात्काराचा गुन्हा दाखल करण्यात आला होता. त्यानंतर या एफआयआरला आव्हान देत पंचोलीने न्यायालयात याचिका दाखल केली. या याचिकेवर आतापर्यंत तब्बल 28 वेळा सुनावणी झाली असूनही अद्याप अंतिम निर्णय झालेला नाही. त्यामुळे प्रकरण लांबणीवर पडल्याचे चित्र दिसत आहे.

दरम्यान, न्यायालयाने या प्रकरणाची पुढील सुनावणी 4 मार्च रोजी होईल. तोपर्यंत हे प्रकरण प्रलंबित राहणार असून, एफआयआर रद्द होणार की नाही, याबाबतचा निर्णय त्या दिवशी समोर येण्याची शक्यता आहे. या खटल्याचा निकाल काय लागतो, याकडे केवळ बॉलिवूडच नव्हे तर सामान्य जनतेचेही लक्ष लागून आहे.