साम टिव्ही प्रतिनिधी - संजय गडदे

मनोरंजन विश्वातून धक्कादायक बातमी समोर आली आहे. प्रसिद्ध अभिनेत्री आणि 'बिग बॉस' स्पर्धक लोपामुद्रा राऊत यांच्या सांताक्रूझ येथील घरातून सुमारे ७६.३९ लाख रुपयांचा मौल्यवान ऐवज चोरीला गेल्याच भयंकर प्रकार घडला आहे. या प्रकरणाचा सांताक्रूझ पोलिसांनी छडा लावला आहे. या प्रकरणी पोलिसांनी एका आरोपीला बिहारमधील दरभंगा येथून अटक केली असून, त्याच्याकडून सुमारे ५१ लाख रुपयांहून अधिक किमतीचा चोरीचा मुद्देमाल जप्त केल्याचा दावा पोलिसांनी केला आहे.

पोलिसांच्या माहितीनुसार, जुलै महिन्यात लोपामुद्रा राऊत यांच्या सांताक्रूझ येथील घरात चोरीची घटना घडली. चोरीच्या मुद्देमालामध्ये महागडे घड्याळ, सोन्याचे दोन बिस्कीट, रोकड तसेच अन्य मौल्यवान वस्तूंचा समावेश होता. घटनेच्या वेळी लोपामुद्रा राऊत कामानिमित्त मुंबईबाहेर होती. अभिनेत्री २० जून ते २७ जुलै या कालावधीत शहराबाहेर गेली होती. याच कालावधीत आरोपीने घरात चोरी केल्याचा पोलिसांचा संशय आहे. चोरीची माहिती मिळाल्यानंतर सांताक्रूझ पोलीस ठाण्यात तक्रार दाखल करण्यात आली.

प्रकरणाचा तपास सुरू असताना पोलिसांनी तांत्रिक माहिती तसेच स्थानिक पातळीवर मिळालेल्या माहितीच्या आधारे आरोपीचा माग काढला. आरोपी बिहारमध्ये असल्याची माहिती मिळाल्यानंतर पोलिसांचे पथक दरभंगा येथे पोहोचले आणि आरोपीला अटक केली.आरोपीच्या ताब्यातून सुमारे ५१ लाख रुपयांहून अधिक किमतीचा चोरीचा मुद्देमाल जप्त करण्यात आला आहे. सांताक्रूझ पोलीस आणि स्थानिक गुन्हे शाखेने संयुक्तपणे ही कारवाई केली.दरम्यान, या चोरीच्या प्रकरणात आरोपीसोबत आणखी कोणी सहभागी होते का, तसेच उर्वरित चोरीचा मुद्देमाल आणि रक्कम कुठे आहे, याचा तपास पोलिसांकडून सुरू आहे.

लोपामुद्रा राऊत ही प्रसिद्ध अभिनेत्री असून सौंदर्य स्पर्धेची विजेतीही राहिली आहे. सलमान खानच्या 'बिग बॉस' कार्यक्रमामुळे अभिनेत्रीला खूप लोकप्रियता मिळाली. तसेच रोहित शेट्टीच्या 'खतरों के खिलाडी' या शोमध्येही अभिनेत्री झळकली आहे. आपल्या अभिनयाने आणि सौंदर्याने तिने प्रेक्षकांचे मन जिंकले. तसेच अभिनेत्रीने काही वेब मालिकांमध्येही काम केले आहे.