Maharashtra Shahir Viral Song: दिग्दर्शक केदार शिंदे यांच्या आगामी चित्रपटाची बरीच चर्चा आहे. थोर लोकशाहीर कृष्णराव गणपत साबळे उर्फ शाहीर साबळे यांच्या जीवनावर आधारित चित्रपट लवकरच प्रेक्षकांच्या भेटीला येणार आहे.

महाराष्ट्र शाहीर असे या चित्रपटाचे नाव आहे. या चित्रपटातील 'बहराला हा मधुमास' हे गाणे काही दिवसांपूर्वीच प्रेक्षकांच्या भेटीला आले. हे गाणे सध्या सोशल मीडियावर ट्रेंड होत आहे.

या ट्रेंडमध्ये मराठी सिनेसृष्टीतील कलाकार देखील थिरकताना दिसत आहेत. केदार शिंदे, भरत जाधव आणि अंकुश चौधरी या तीन मित्रांनी या चित्रपटातील गाण्यावर डान्स केला आहे. त्याच्या या डान्सचा व्हिडिओ सध्या सोशल मीडियावर व्हायरल होत आहे.

अंकुश चौधरीने त्यांच्या डान्सचा व्हिडिओ सोशल मीडियावर शेअर केला आहे. या गाण्यावर तिघेही खूप गोड डान्स स्टेप करत आहेत. कोरिओग्राफर कृती या तिघांना डान्स शिकवत आहे. तर हे तिन्ही कलाकार तिला डान्स करताना फॉलो करत आहेत.

या तिघांसोबत महाराष्ट्र शाहीर चित्रपटातील मुख्य अभिनेत्री आणि केदार शिंदे यांची मुलगी सना देखील डान्स करताना आणि फुल उडवताना दिसत आहे.

महाराष्ट्र शाहीर निमित्त भरत, अंकुश आणि केदार पुन्हा एकत्र आले आहेत. त्यामुळे हा चित्रपट पाहण्यासाठी प्रेक्षक उत्सुक आहेत. हे त्रिकुट पडद्यावर धम्माल करणार याची सर्वांना खात्री आहे.