Ashi Hi Banwa Banwi: मराठी चित्रपटसृष्टीत 'कल्ट क्लासिक' ठरलेला 'अशी ही बनवाबनवी' या विनोदी चित्रपटाला आज ३७ वर्षे पूर्ण झाली आहेत. २३ सप्टेंबर १९८८ रोजी प्रदर्शित झालेला हा चित्रपट केवळ त्या काळातच नाही तर आजही प्रेक्षकांना खळखळून हसवतो. 'क्लासिक कॉमेडी' म्हटलं की मराठी रसिकांच्या मनात पहिल्यांदा या चित्रपटाचंच नाव येतं.

या चित्रपटाची कथा आणि पटकथा सुप्रसिद्ध लेखक वसंत सबनीस यांनी लिहिली. त्यांच्या लेखणीतील विनोदाची धार, संवादातील सहजता आणि परिस्थितिजन्य विनोदाची ताकद यामुळे चित्रपट आजही प्रेक्षकांच्या मनात तितकाच ताजा आहे. दिग्दर्शन, कलाकारांचा अभिनय आणि संगीत यांचा उत्कृष्ट संगम साधला गेल्यामुळे ‘अशी ही बनवाबनवी’ हा केवळ मनोरंजनाचा सिनेमा न राहता मराठी संस्कृतीचा एक भाग बनला.

चित्रपटातील सर्व पात्रांनी प्रेक्षकांच्या मनावर अमिट छाप सोडली. अशोक सराफ यांनी साकारलेला ‘धनंजय माने’ हा व्यक्तिरेखा आजही प्रचंड लोकप्रिय आहे. इतकंच नाही तर आजही त्यांना अनेकजण या नावाने संबोधतात. लक्ष्मीकांत बेर्डे यांचा जबरदस्त विनोद, सचिन पिळगांवकर यांची सहज शैली, सुप्रिया पिळगांवकर, निवेदिता जोशी, अश्विनी भावे, प्रिया अरुण यांची मोहक उपस्थिती, तसेच सुधीर जोशी, विजू खोटे यांसारख्या ज्येष्ठ कलाकारांनी या चित्रपटाला एक वेगळीच उंची दिली.

या चित्रपटातील गाणी प्रेक्षक आजही गुणगुणतात. “मनुजा जाग जरा”, “कुणीतरी येणार गं”, “हृदयी वसंत फुलताना”, आणि “अशी ही बनवाबनवी” या गाण्यांनी केवळ कथानकाला रंगतच आणली नाही तर पिढ्यानपिढ्या मराठी प्रेक्षकांच्या ओठांवर ही गाणी राहिली आहेत. या गाण्यांचा आनंद आजही लग्नसमारंभ, सांस्कृतिक कार्यक्रम किंवा कौटुंबिक गाठीभेटींमध्ये अनुभवायला मिळतो.

‘अशी ही बनवाबनवी’च्या संवादांनाही प्रचंड लोकप्रियता मिळाली. “धनंजय माने इथेच राहतात का?', 'जाऊ बाई नका बाई इतक्यात जाऊ', 'हा माझा बायको पार्वती' अशा संवादांनी प्रेक्षकांना हसून हसून लोटपोट केलं. आज सोशल मीडियावरही या संवादांचे मीम्स, रील्स तयार होतात. हे या चित्रपटाचं आजच्या पिढीतलं टिकून राहिलेलं वेगळं आकर्षण आहे.