Stand Up Comedian Passes Away: अमेरिकेतील लोकप्रिय स्टँड-अप कॉमेडियन रेगिनाल्ड “रेगी” कॅरोल (वय ५२) याचा मिसिसिपी येथे झालेल्या गोळीबारात मृत्यू झाला आहे. २० ऑगस्ट रोजी साउथेवन परिसरात ही घटना घडली. पोलिसांनी दिलेल्या माहितीनुसार, कॅरोलला गोळी लागल्यानंतर तातडीने वैद्यकीय उपचार सुरू करण्यात आले आणि त्याला मेम्फिस येथील रुग्णालयात दाखल करण्यात आले. मात्र उपचारादरम्यान त्यांचा मृत्यू झाला.

या प्रकरणात ३८ वर्षीय ट्रानेल मारक्विस विल्यम्स याला अटक करण्यात आली असून त्याच्यावर खुनाचा आरोप लावण्यात आला आहे. पोलिस तपास सुरू असून या हत्येमागचे कारण अद्याप स्पष्ट झालेले नाही.

रेगी कॅरोल बॉल्टिमोर येथे स्थायिक होता आणि त्याने अनेक कॉमेडी शोमध्ये भाग घेतला होता. २०२३ साली त्यांनी “Knockout Kings of Comedy” या विशेष कार्यक्रमाचे सूत्रसंचालन व निर्मिती केली होती. त्याशिवाय “The Parkers” आणि “Showtime at the Apollo” सारख्या कार्यक्रमांतून त्याने प्रेक्षकांचे भरभरून मनोरंजन केले होते.

रेगी याच्या निधनानंतर कॉमेडी क्षेत्रात शोककळा पसरली आहे. सुप्रसिद्ध अभिनेत्री-कॉमेडियन मो’निक यांनी त्याला आपला “कॉमेडीमधील भाऊ” संबोधत श्रद्धांजली अर्पण केली आहे. बॉल्टिमोरमधील मोबटाउन कॉमेडी क्लबनेही सोशल मीडियावर शोक व्यक्त करत लिहिले की, “रेगी हे आमच्यासाठी एक आधारस्तंभ होते, त्यांचे योगदान अमूल्य आहे.”