Deepika Padukone Exit Kalki 2: बॉलीवूडची टॉप अभिनेत्री दीपिका पादुकोण गेल्या काही महिन्यांपासून चर्चेत आहे. तिने आयुष्यातील नुकताच एक मोठा टप्पा गाठला आहे. तिने काही काळापूर्वीचं एका गोड मुलीला जन्म दिला आहे. मातृत्वाची जबाबदारी स्वीकारल्यानंतर दीपिकाने आपल्या कामाच्या वेळापत्रकात मोठा बदल करण्याची भूमिका घेतली. ती आता कोणताही प्रकल्प निवडताना अत्यंत विचारपूर्वक निर्णय घेत आहे. याचसह दिपीकाने स्पिरीटनंतर कल्की २ सोडण्याचा निर्णय घेतला आहे.

दिग्दर्शक नाग अश्विन यांचा विज्ञानकथा पट ‘कल्कि 2898 एडी’ प्रेक्षकांमध्ये प्रचंड लोकप्रिय झाला. या चित्रपटात दीपिकाची व्यक्तिरेखा अत्यंत महत्वाची होती. कथानकात तिचे पात्र भविष्यात भगवान विष्णूचा दहावा अवतार ‘कल्की’ जन्म देते असे दाखवण्यात आले आहे. त्यामुळेच या चित्रपटाच्या सिक्वेलमध्ये दीपिका महत्त्वाची भूमिका बजावेल, अशी प्रेक्षकांची अपेक्षा होती.

मात्र, वैजयंती चित्रपट या निर्मिती संस्थेने नुकतीच एक अधिकृत घोषणा केली. त्यांनी जाहीर केले की, दीपिका पादुकोण ‘कल्कि 2898 एडी’ च्या सिक्वेलचा भाग असणार नाही. याआधी ती प्रभाससोबतच्या ‘स्पिरीट’ या चित्रपटातही दिसणार नसल्याची माहिती समोर आली होती. सलग दोन मोठ्या चित्रपटांतून दीपिकेच्या बाहेर पडण्यामुळे चाहते आश्चर्यचकित झाले आहेत.

निर्मात्यांनी आपल्या निवेदनात म्हटले आहे की, “आम्ही काळजीपूर्वक विचार करून निर्णय घेतला आहे. योग्य भागीदारी होऊ शकली नाही, त्यामुळे दीपिका पुढील चित्रपटात नसणार आहे.” या निवेदनानंतर सोशल मीडियावर चाहत्यांच्या वेगवेगळ्या प्रतिक्रिया दिल्या आहेत. काहींनी या निर्णयाबद्दल निराशा व्यक्त केली, तर काहींनी दीपिकेच्या कौटुंबिक कारणांबद्दल सहानुभूती दर्शवली.

दीपिकाच्या जवळच्या सूत्रांनुसार, सध्या ती आपल्या मुलीवर विशेष लक्ष देत आहे . तिने चित्रपट निर्मात्यांकडे काही विशिष्ट अटी मांडल्या होत्या, ज्यात “दररोज फक्त ८ तासांची शूटिंग शिफ्ट” हा मुद्दा सर्वात महत्त्वाचा होता. या अटीमुळे काम-जीवन संतुलन साधता येईल, असे तिचे म्हणणे होते. मात्र काही निर्माते या अटींवर तयार नसल्यामुळे तिला हे चित्रपट सोडावे लागतं आहेत.