Mardaani 3 Release Date : बॉलिवूड अभिनेत्री रानी मुखर्जी पुन्हा एकदा 'मर्दानी' फ्रँचायझीच्या तिसऱ्या भागात म्हणजेच 'मर्दानी 3' मध्ये, धाडसी पोलिस अधिकारी शिवानी शिवाजी रॉयच्या भूमिकेत परतणार आहेत. यशराज फिल्म्सने नुकतेच या चित्रपटाचा फर्स्ट लुक आणि रिलीज डेट जाहीर केला आहे.

चित्रपटाचे दिग्दर्शन अभिराज मीनावाला करत आहेत, यापूर्वी त्यांनी 'बँड बाजा बारात', 'गुंडे', 'सुलतान' आणि 'टायगर 3' सारख्या यशस्वी चित्रपटांमध्ये सहाय्यक दिग्दर्शक म्हणून काम केले आहे. 'मर्दानी 3' मध्ये रानी मुखर्जी पुन्हा एकदा शिवानी शिवाजी रॉयच्या भूमिकेत दिसणार आहेत, जी एक निर्भय पोलिस अधिकारी आहे .

'मर्दानी' फ्रँचायझीची सुरुवात २०१४ मध्ये झाली, यामध्ये रानी मुखर्जीने पहिल्यांदा शिवानी शिवाजी रॉयची भूमिका साकारली होती. त्यानंतर २०१९ मध्ये 'मर्दानी 2' प्रदर्शित झाला, यामध्ये तिच्या अभिनयाची खूप प्रशंसा झाली. आता, 'मर्दानी 3' मध्ये ती पुन्हा एकदा याच भूमिकेत दिसणार आहे, ज्याची प्रेक्षक आतुरतेने वाट पाहत आहेत.

चित्रपटाच्या फर्स्ट लुकमध्ये रानी मुखर्जी पोलिस वर्दीत, हातात बंदूक घेऊन, गंभीर लूकमध्ये दिसत आहेत. या लूकने सोशल मीडियावर चाहत्यांमध्ये उत्सुकता निर्माण केली आहे. 'मर्दानी 3' हा चित्रपट २७ फेब्रुवारी २०२६ रोजी म्हणजेच होळीच्या काळात प्रदर्शित होणार आहे.