प्रसिद्ध अभिनेते,गोदरेज कुटुंबाच्या बिझनेसचे माजी एग्जीक्यूटिव डायरेक्टर विजय कृष्णा यांचं वयाच्या ८१ व्या वर्षी निधन झालं. विजय कृष्णा यांनी 'देवदास' सिनेमात शाहरुख खान यांच्या 'ऑन स्क्रिन' वडिलांची भूमिका साकरली होती. त्यांच्या जाण्याने त्यांचं कुटुंब आणि चाहते शोकसागरात बुडालंय. विजय कृष्णा यांच्या निधनाने पत्नी स्मिता कृष्णा आणि मुलगी नायरिका होळकर यांच्यावर दु:खाचा डोंगर कोसळला आहे.

विजय कृष्णा यांनी २५ वर्षांहून अधिक काळ अभिनय केला. 'डान्स लाइक ए मॅन' या सिनेमात त्यांनी केलेल्या भूमिकेचं सर्वत्र कौतुक झालं होतं. हा सिनेमा पामेला रुक्स यांनी दिग्दर्शित केला होता. 'डान्स लाइक ए मॅन' हा सिनेमा महेश दत्तानी यांच्या नाटकावर आधारित होता. या सिनेमातून शोभना, आरिफ जकारिया, अनुष्का शंकर यांनी डेब्यू केला.

बॉलिवूडमध्ये विजय कृष्णा यांना संजय लीला भन्साली यांच्या २००२ साली प्रदर्शित झालेल्या 'देवदास' सिनेमात शाहरुख खानचे वडील नारायण यांची भूमिका केली होती. या सिनेमात ऐश्वर्या रॉय, माधुरी दीक्षित, जॅकी श्रॉफ आणि किरण खेर हे कलाकार देखील होते. मात्र, त्यांनी केलेली भूमिका जास्त चर्चेत राहिली. विजय कृष्णा यांच्या निधनावर कलाकार लिलेट दुबे यांनी सोशल मीडियावर दु:ख व्यक्त केलं आहे. त्यांच्या अनेक चाहत्यांनी त्यांना श्रद्धांजली वाहिली आहे.