परफेक्शनिस्ट अभिनेता आमिर खान आणि भारतीय सिनेमाचे जनक दादासाहेब फाळके यांच्या चाहत्यांसाठी एक आनंदाची बातमी आहे. दादासाहेब फाळके यांच्या जीवनावर आधारीत लवकरच बायोपिक प्रेक्षकांच्या भेटीस येणार आहे. या ऐतिहासिक चित्रपटामध्ये आमिर खान मुख्य भुमिका साकारणार असून, या चित्रपटाचे दिग्दर्शन राजकुमार हिरानी करणार आहेत. त्यामुळे या चित्रपटाची उत्सुकता प्रत्येक चित्रपटप्रेमिंना लागली आहे.

भारत सरकारकडून दिला जाणारा सर्वात प्रतिष्ठेचा दादासाहेब फाळके पुरस्कार ज्यांच्या नावाने आहे, त्या व्यक्तिमत्वाची कथा आजपर्यंत हिंदी सिनेमात साकारण्यात आली नव्हती, ही बाबच आश्चर्यकारक होती. मात्र, दादासाहेब फाळके यांचा जीवनप्रवास लवकरच रूपरी पद्यावर प्रेक्षकांना अनुभवता येणार आहे.

या चित्रपटाचे शूटिंग ऑक्टोबर २०२५ पासून सुरू होणार आहे. 'सितारे जमीन पर'च्या प्रदर्शनानंतर आमिर खान लवकरच या भूमिकेसाठी तयारी सुरू करणार आहेत. चित्रपटासाठी लॉस एंजलिसमधील व्हीएफएक्स स्टुडिओंनी त्या काळातील युगदर्शक डिझाइन्स आधीच एआयच्या साहाय्याने तयार केली आहेत.

या चित्रपटाच्या लेखनावर राजकुमार हिरानी, अभिजात जोशी, हिंदुकुश भारद्वाज आणि अविष्कार भारद्वाज हे चार लेखक गेले चार वर्षे झाले काम करत आहेत. विशेष म्हणजे, दादासाहेब फाळके यांचे नातू चंद्रशेखर श्रीकृष्ण पुसळकर यांनी या प्रकल्पासाठी आपला पूर्ण पाठिंबा दिला असून त्यांनी त्यांच्या आजोबांच्या आयुष्यातील अनेक खास आठवणी आणि प्रसंग शेअर केले आहेत, जे पटकथेसाठी अत्यंत मौल्यवान ठरत आहेत.