पालघर, ता. २५ जून २०२४

विवाहित महिलेची प्रियकराने गळा दाबून हत्या केल्याची धक्कादायक घटना विरारमध्ये घडली आहे. धनश्री आंबडस्कर असे हत्या झालेल्या महिलेचे नाव असून याप्रकरणी प्रियकरावर विरार पोलिसांत गुन्हा दाखल करण्यात आला आहे. या घटनेने परिसरात एकच खळबळ उडाली आहे.

याबाबत सविस्तर माहिती अशी की, धनश्री आंबडस्कर ही विवाहित महिला विरार पूर्वेच्या फुलपाडा येथील साईधाम अपार्टमेंटमध्ये राहत होती. तिचे शेखर कदम नावाच्या तरुणाशी प्रेमसंबंध होते. सोमवारी (ता. २४ जून) सकाळी तिचा पती कामावर गेला असताना तिचा प्रियकर शेखर कदम हा तिला भेटायला घरी आला होता.

यावेळी दोघांमध्ये वाद निर्माण झाला. याच वादातून रागाच्या भरात प्रियकर शेखर कदम याने गळा दाबून धनश्रीची हत्या केली. हत्येनंतर तिला चक्कर आल्याचे शेजाऱ्यांना सांगून आरोपी प्रियकराने पळ काढला. शेजाऱ्यांनी तिला नजीकच्या दवाखान्यात दाखल केले.

मात्र डॉक्टरांनी तिला उपचाराआधीच मयत घोषित केल्याने त्यानंतर हे संपूर्ण प्रकरण उघडकीस आले. विरार पोलिसांना या घटनेची माहिती मिळाल्यानंतर पोलिसांनी आरोपी प्रियकराला अटक केली आहे. पोलीस या प्रकरणाचा अधिक तपास करत आहेत.