उत्तर प्रदेशमध्ये ५ वर्षांच्या मुलीवर बलात्कार करण्यात आल्याची धक्कादायक घटना समोर आली आहे. वडिलांच्या मित्रानेच हे भयंकर कृत्य केले. आरोपी ५ वर्षांच्या मुलीला खेळण्याच्या बहाण्याने सोबत घेऊन गेला आणि तिच्यावर बलात्कार केला. त्यानंतर आरोपी घटनास्थळावरून पळून गेला. मुलीची अवस्था पाहून कुटुंबीय प्रचंड घाबरले. सध्या पीडित मुलीवर रुग्णालयात उपचार सुरू आहेत. पोलिसांनी आरोपीविरोधात गुन्हा दाखल करत त्याला अटक केली.

मिळालेल्या माहितीनुसार, ही घटना लखनऊच्या इंदिरानगर परिसरात घडली. आरोपी आणि पीडित मुलीचे वडील दोघेही बिहारचे राहणारे आहेत. आरोपी आणि मुलीचे वडील दोघेही मित्र आहेत. दोघे सोबतच शटरिंगचे काम करतात. शनिवारी रात्री आरोपी पीडित मुलीच्या घरी आला. तिच्या वडिलांसोबत तो दारू प्यायला. त्यानंतर आरोपीने त्याच्या मित्राला सांगितले की तुझ्या मुलीला खेळायला बाहेर घेऊन जातो. आरोपीने मित्राच्या घरापासून काही अंतरावर मुलीला नेऊन तिच्यावर बलात्कार केला. त्यानंतर तो पळून गेला.

रक्ताने माखलेली मुलगी रडत रडत घरी आली त्यानंतर तिने आरोपीने तिच्यासोबत केलेल्या भयंकर कृत्याची माहिती आई-वडिलांना दिली. तेव्हा त्यांच्या पायाखालची जमीन सरकली. त्यांनी पीडित मुलीला सोबत घेऊन पोलिस ठाणे गाठले आणि आरोपीविरोधात तक्रार दाखल केली. पोलिसांनी पीडित मुलीला रुग्णालयात दाखल केले. त्यानंतर पोलिसांनी आरोपीविरोधात पोक्सो कायद्यांतर्गत गुन्हा दाखल केला. पोलिांनी काही तासांच आरोपीला अटक केली.

पोलिसांनी सांगितले की, घटनेनंतर आरोपी घरातून पळून गेला. पोलिसांनी आरोपीच्या घरी धाव घेतली तर त्याची बायकोच घरी होती. पोलिसांनी तिची चौकशी केली त्यानंतर आरोपीच्या मोबाइलवर कॉल केला पण तो उचलत नव्हता. त्यानंतर पोलिसांनी आरोपीचा शोध घेत घटनेच्या अवघ्या ७ तासांच्या आत त्याला अटक केली. या घटनेमुळे उत्तर प्रदेशमध्ये खळबळ उडाली.