तेलंगणाच्या मेदीपल्लीमध्ये मन हेलावून टाकणारी घटना घडली. २७ वर्षीय तरुणाने आपल्या गर्भवती बायकोची हत्या केली. हत्येनंतर तिच्या मृतदेहाचे तुकडे करून ते नदीमध्ये फेकून दिले. या घटनेमुळे तेलंगणामध्ये खळबळ उडाली. या प्रकरणी पोलिसांनी आरोपीला अटक केली. पोलिस या घटनेचा तपास करत आहेत. सुरूवातीला आरोपीने पोलिसांची दिशाभूल करण्याचा प्रयत्न केला पण तपासादरम्यान पोलिसांना त्याच्यावर संशय आला. पोलिसांनी त्याची कसून चौकशी केली असता त्याने गुन्हा कबूल केला.

मिळालेल्या माहितीनुसार, २१ वर्षीय स्वाती उर्फ ज्योती आणि तिचा नवरा महेंद्र रेड्डी हे मेदिपल्लीच्या बोदुप्पल भागामध्ये राहत होते. आरोपी ड्रायव्हर म्हणून काम करत होता. स्वाती गर्भवती होती. शनिवारी सायंकाळी ४ वाजता आरोपीचे बायकोसोबत किरकोळ कारणावरून भांडण झाले. या भांडणानंतर संतप्त झालेल्या महेंद्रने स्वातीचा गळा दाबून तिची हत्या केली.

बायकोची हत्या केल्याची गोष्ट लपवण्यासाठी त्याने हेग्जा ब्लेडच्या सहाय्याने मृतदेहाचे तुकडे केले. त्यानंतर डोकं, हात आणि पाय मूसी नदीमध्ये फेकून दिले. तर मृतदेहाचे इतर तुकडे त्याने घरातील एका खोलीत बॉक्समध्ये लपवून ठेवले. पोलिसांनी आरोपीच्या घरातून मृतदेहाचे अनेक तुकडे जप्त केले. तर नदीमध्ये फेकलेल्या मृतदेहाचे तुकडे शोधले जात आहेत.

आरोपीने बायकोची हत्या केल्याची माहिती त्याच्या कुटुंबीयांना सांगितली. त्यानंतर या घटनेबाबत पोलिसांना कळवण्यात आले. आरोपीने आपल्या बहिणीला फोन करून ज्योती बेपत्ता झाल्याचे सांगितले होते. आरोपीच्या कुटुंबीयांना संशय आल्यानंतर त्यांनी पोलिसांना सांगितले. पोलिसांनी आरोपीच्या घरात सापडलेले मृतदेहाचे तुकडे पोस्टमॉर्टमसाठी रुग्णालयामध्ये पाठवण्यात आले आहेत. मृतदेहाची डीएनए टेस्ट केली जाणार आहे.

महेंद्र आणि ज्योती हे दोघे विकाराबाद जिल्ह्यातील राहणारे होते. त्यांचे घर आसपासच होते. दोघांचे अनेक वर्षांपासून प्रेमसंबंध होते. २०२४ मध्ये त्यांनी लग्न केले. लग्नानंतर दोघेही हैदराबादला निघून गेले. लग्नाच्या एका महिन्यानंतर दोघांमध्ये वाद सुरू झाला. एप्रिल २०२४ मध्ये स्वातीने पोलिस ठाण्यात धाव घेत नवरा त्रास देत असल्याची तक्रार केली होती.

ज्योती गेल्या ३ महिन्यांपासून कॉल सेंटरमध्ये नोकरी करत होती. महेंद्रला संशय होता की तिचे कुणासोबत तरी अनैतिक संबंध आहेत. त्यामुळे त्याने स्वातीला नोकरी सोडण्यासाठी दबाव टाकला. मार्च २०२५ मध्ये ज्योती प्रग्नेंट राहिली. त्यानंतर महेंद्रने तिला सांगितले की तू काही महिने माहेरी निघून जा. त्यावरूनच दोघांमध्ये नेहमी वाद व्हायचे. या वादातूनच त्याने गर्भवती स्वातीची हत्या केली. पण अद्याप हत्येचे खरं कारण समोर आले नाही.