रिलबाजीच्या नादात तरुणाई वाहवत चालल्याचं प्रमाण वाढलं आहे. लाईक आणि व्ह्यूजच्या नादात अनेकदा हानी पोहचेल अशा ठिकाणी तरुण मंडळी रिल्स बनवतं असल्याचं आढळून येत. अशाच एका सांगलीतील तरुणाला त्याची स्टंटबाजी अंगलट आली आहे. धोकादायकरीत्या वाहन चालवत या तरुणाने रिल्स बनवल्याचे समोर आले आहे. याप्रकरणी वाहतूक पोलिसांनी या तरुणाला चांगलीच अद्दल घडवली आहे. आणि त्याच्याकडून २२ हजाराचा दंड वसूल केला आहे.

मिळालेल्या माहितीनुसार, सांगली शहरात एक तरुण हा धोकादायक रित्या सार्वजनिक ठिकाणी रस्त्यावर वाहन चालवून स्टंटबाजी करत होता. वाहतूक पोलिसांच्या हे लक्षात येताच त्यांनी धडक कारवाई केली आहे. माहितीच्या अनुषंगाने मॉनिटरिंग सील कडून अधिकची माहिती प्राप्त करून घेऊन संबंधित स्टंटबाजी करणाऱ्या तरुणाचे वाहन ताब्यात घेण्यात आले आहे.

शिवाय या तरुणावर अधिनियम अंतर्गत विरुद्ध कारवाई करत त्याच्या कडून २२ हजार रुपये दंड रोख स्वरूपात वसूल केला आहे. सदरची कामगिरी ही पोलीस अधीक्षक श्री संदीप घुगे यांच्या मार्गदर्शनाखाली वाहतूक शाखेचे वरिष्ठ पोलीस निरीक्षक मुकुंद कुलकर्णी यांनी केलेली आहे.

दरम्यान अशा पद्धतीची स्टंटबाजी करणाऱ्या तरुणाईला चाप बसावा यासाठी पोलिसांचं बारीक लक्ष असणार आहे. तसेच अशा प्रकारे स्टंटबाजी करताना आढळल्यास कारवाई करण्यात येणार असल्याचं पोलिसांनी म्हटलं आहे.