छत्रपती संभाजीनगरमध्ये नात्याला काळिमा फासणारी घटना घडली आहे. हर्सूल परिसरातून बेपत्ता झालेला सचिन पुंडलिक औताडे (३२) याचा प्रेमसंबंधातून गळा चिरून हत्या झाल्याचे समोर आले आहे. लग्नाचा तगादा लावणाऱ्या प्रेयसीला नकार दिल्याने ही हत्या घडवून आणल्याचे तपासात स्पष्ट झाले.याप्रकरणी पोलिसांनी दोघांना ताब्यात घेतले आहे तर अद्याप एक आरोपी फरार आहे.

नेमकं काय घडलं ?

मिळालेल्या माहितीनुसार ३१ जुलै रोजी दुपारी साडेबारा वाजता सचिन औताडे घरातून काहीही न सांगता दुचाकी घेऊन बाहेर पडला होता. त्यानंतर तो परतलाच नाही. नातेवाईकांनी व कुटुंबीयांनी शोधाशोध केली, मात्र काहीच निष्पन्न झाले नाही. त्यामुळे हर्सूल पोलीस ठाण्यात बेपत्ता असल्याची नोंद करण्यात आली होती.

कसा सापडला सचिनचा मृतदेह ?

याच दरम्यान १३ ऑगस्ट रोजी शेवगाव तालुक्यातील मुंगी येथे शेतकरी सदाशिव राजेभोसले यांच्या शेताजवळ गोदावरी नदीच्या पात्रात एक मृतदेह आढळला. त्यावरून शेवगाव पोलीस ठाण्यात आकस्मित मृत्यूची नोंद झाली होती. तपासादरम्यान मृताच्या उजव्या हातावर "सचिन" असे मराठीत कोरलेले आणि मानेवर "भारती" असे इंग्रजीत कोरलेले आढळून आले. त्यामुळे हा मृतदेह हरविलेल्या सचिन औताडे याचाच असल्याचे स्पष्ट झाले.

आरोपींना बेड्या

पोलिसांनी तपासादरम्यान परिसरातील सीसीटीव्ही फुटेज तपासले असता, आरोपी मृतदेह घेऊन जाताना त्यात कैद झाल्याचे समोर आले. यावरून पोलिसांनी संशयितांचा मागोवा घेतला. अखेर ते बुलढाणा जिल्ह्यात असल्याची माहिती मिळाल्यानंतर स्थानिक गुन्हे शाखेच्या पथकाने आरोपी दुर्गेश तिवारी आणि भारती दुबे यांना अटक केली. प्राथमिक चौकशीत त्यांनीच खून केल्याची कबुली दिली आहे.

कशी झाली हत्या ?

आरोपींनी दिलेल्या कबुलीनुसार, ३१ जुलैला सचिन व भारती कॅनॉटमधील तिच्या फ्लॅटवर थांबले असताना त्यांच्यात वाद झाला. त्यावेळी भारतीने मामेभाऊ दुर्गेश तिवारीला बोलावले. दारूच्या नशेत झालेल्या या वादात दुर्गेशने चाकूने सचिनचा गळा चिरून हत्या केली. त्यानंतर मृतदेह अफरोज खानच्या मदतीने गाडीतून नेऊन पैठणजवळ नदीत टाकण्यात आले.

पोलिस तपासात काय समोर आलं ?

अहिल्यानगर पोलिसांच्या माहितीनुसार,या प्रकरणातील मुख्य कारण प्रेमसंबंध आणि त्यातील तणाव समोर आले आहेत. भारती दुबे ही स्थानिक छावा संघटनेची महिला पदाधिकारी असून, सचिन औताडे हा देखील त्याच संघटनेत काम करीत होता. दोघांचे परस्पर प्रेमसंबंध असूनही सचिन विवाहित असल्याने त्याने भारतीशी लग्न करण्यास नकार दिला होता. त्यातूनच हा वाद निर्माण झाला. कुटुंबीयांकडूनही या नात्याला विरोध होता. या सर्व पार्श्वभूमीवर भारतीने मामेभावाच्या मदतीने सचिनचा काटा काढला.