बिहारच्या बक्सर जिल्ह्यातून एक हादरवून टाकणारी बातमी समोर आली आहे. बक्सर जिल्ह्यातील मुफस्सिल पोलीस ठाण्याच्या हद्दीतील एका गावात रविवारी दुपारी पाच वर्षांच्या चिमुकलीवर बलात्कार झाल्याची घटना उघडकीस आलीये. ही चिमुकली एका बांधकाम सुरू असलेल्या इमारतीत रडत होती. तिच्या रडण्याचा आवाज ऐकून गावकरी धावले आणि तेव्हा हा प्रकार समोर आला.

यावेळी त्या चिमुकल्या मुलीला तातडीने उपचारासाठी रुग्णालयात दाखल करण्यात आलं. या प्रकरणात आरोपीदेखील अल्पवयीन असल्याचं पोलिसांनी सांगितलंय. दरम्यान याबाबत अजून गुन्हा नोंदवला गेलेला नाही. पोलीस तपास करत असून पुढील कारवाईची तयारी सुरू आहे.

ही एकच घटना नसून सिमरी बख्तियारपूरच्या सिटानाबाद दक्षिणी पंचायतातील पठाण टोला, वार्ड क्रमांक ७ मध्ये रविवारच्याच दिवशी संध्याकाळी जुन्या वैमनस्यातून आठ वर्षांच्या ओबेश या मुलाची धारदार शस्त्राने गळा चिरून हत्या करण्यात आली. त्याला वाचवण्यासाठी धावलेली त्याची मोठी बहीण हिच्या हाताला किरकोळ जखम झाल्याची माहिती आहे.

मृत्यू झालेल्या मुलाची आई सकीना खातून यांनी सांगितलं की, त्यांचा मुलगा घराजवळ खेळत होता. यावेळी त्यांच्या शेजाऱ्याने जुन्या एका रागातून हल्ला केला. गंभीर जखमी अवस्थेत त्याला सिमरी बख्तियारपूरच्या अनुमंडलीय रुग्णालयात नेण्यात आलं. मात्र त्यावेळी डॉक्टरांनी त्याला मृत घोषित केलं.

या घटनेबाबत एसडीपीओ मुकेश कुमार ठाकूर यांनी माहिती देताना सांगितलं की, प्राथमिक तपासात हा खून असल्याचं दिसतंय. या हत्येप्रकरणी आरोपीचा शोध घेण्यात येतोय. तसंच दोषींवर कठोर कारवाई केली जाईल, असं त्यांनी स्पष्ट केलंय.