नांदेड शहरात पुन्हा एकदा गुंडगिरीचा धक्कादायक प्रकार घडला असून, शहरातील वजीराबाद परिसरात असलेल्या जिल्हा मध्यवर्ती बँकेच्या आवारात चालणाऱ्या वाईन मार्टमध्ये दोन अज्ञात इसमांनी धुमाकूळ घातला आहे. रात्री साडेनऊच्या सुमारास हा प्रकार घडला असून, या हल्ल्यात वाईन मार्टचे मालक रितेश जयस्वाल व त्यांच्या मॅनेजरवर जीवघेणा हल्ला करण्यात आला. या घटनेमुळे परिसरात मोठी खळबळ उडाली आहे.

मिळालेल्या माहितीनुसार, दोघे आरोपी वाईन मार्टमध्ये आले आणि सुरुवातीला त्यांनी ग्राहक असल्याचा बहाणा करत दारू विकत घेतली. मात्र, त्यानंतर त्यांनी उघडपणे पैसे न देता मालकावर दबाव आणला. एवढेच नाही, तर "आमच्याकडून पैसे घेतले जात नाहीत, उलट तुम्हालाच दर महिन्याला दहा हजार रुपये हप्ता द्यावा लागेल" अशा शब्दांत धमकी दिली.

अचानक उफाळून आलेल्या या वादात जयस्वाल यांनी विरोध केल्यावर आरोपींनी त्यांच्या डोक्यावर दारूची बाटली फोडली. या हल्ल्यात जयस्वाल गंभीर जखमी झाले. त्यानंतर आरोपींनी काठीने त्यांच्या हातावर आणि पायावर बेदम मारहाण केली. फक्त एवढ्यावर न थांबता आरोपींनी जयस्वाल यांच्या गळ्यातील सोन्याची चैन आणि बोटातील सोन्याची अंगठी हिसकावून घेतली.

तब्बल १ लाख ४० हजार रुपयांचा ऐवज घेऊन आरोपी घटनास्थळावरून फरार झाले. या संपूर्ण घटनेचा प्रकार सीसीटीव्ही कॅमेऱ्यात कैद झाला आहे. या पुराव्याच्या आधारे वजीराबाद पोलिसांनी गुन्हा दाखल केला आहे. या घटनेनंतर व्यापारी वर्गात आणि परिसरातील नागरिकांमध्ये मोठी भीती निर्माण झाली आहे.