पुणे|ता. २९ एप्रिल २०२४

पुणे जिल्ह्यातील शिरुर तालुक्यातील शिंदेवाडी गावात बैलगाडा शर्यतीदरम्यान दोन कुटुंबात जोरदार राडा झाल्याची घटना रविवारी घडली. कौटुंबिक वादातून झालेल्या या राड्यामध्ये झालेल्या मारहाणीत एक तरुण गंभीर जखमी झाला होता. या जखमी तरुणाचा मृत्यू झाल्याचे समोर आले आहे. या धक्कादायक प्रकाराने शिरुर तालुका हादरुन गेला आहे.

याबाबत सविस्तर माहिती अशी की, पुणे जिल्ह्याच्या शिरूर तालुक्यातील मलठण येथील शिंदेवाडी येथे गावच्या यात्रेनिमित्त बैलगाडा शर्यतीचे आयोजन करण्यात आले होते. या बैलगाडा शर्यतीदरम्यानच भाऊबंदकीच्या जुन्या वादातून दोन गट आमने सामने आले. हा कौटुंबिक वाद इतका टोकाला गेला की दोन्ही गटात तुंबळ हाणामारी झाली.

या मारहाणीत संजय शिंदे हा तरुण गंभीर जखमी झाला होता. या जखमी तरुणाचा उपचारादरम्यान मृत्यू झाल्याचे समोर आले आहे. या प्रकरणी शिरूर पोलीस ठाण्यात भानुदास शिंदे, ज्ञानोबा शिंदे यांच्यावर गुन्हा दाखल झाला असून पुढील तपास करत आहेत.

जमिनीच्या जुन्या वादातून ही हत्या झाल्याचे बोलले जात आहे. या वादात गावच्या यात्रा कमीटीचा ग्रामस्थांचा काहीही सबंध नसून हा दोन कुटूंबातील भावकीचा वाद असल्याचे ग्रामस्थाकडून स्पष्ट करण्यात आले आहे. दरम्यान, या धक्कादायक घटनेने शिरुर तालुका हादरुन गेला आहे.