पुणे : राज्यात गुन्हेगारीचं प्रमाण वाढत चाललं आहे. पुण्यात तर याचं प्रमाण अधिक होत चाललं आहे. हत्या, बलात्कार, दरोडा यांसारख्या घटनांवर पोलीस चाप लावू शकत नाहीयत. पुणे जिल्ह्यात गुन्हेगारांना पोलिसांचा धाक उरलेला आहे की नाही? असा सवाल आता नागरिक उपस्थित करत आहेत. त्याचदरम्यान, शहरात पुन्हा एक हत्येची बातमी समोर आली आहे. पिंपरी चिंचवडमध्ये ऑफलाईन गेमच्या खेळात एका मुलाची हत्या झाल्याचा धक्कादायक प्रकार समोर आला आहे. नवा व्यापार (ऑफलाईन गेम) खेळताना दोन मित्रांमध्ये भांडण झालं. त्यानंतर जाब विचारायला गेलेल्या मोठ्या तथा अल्पवयीन भावाचा यात नाहक बळी गेला.

ऑफलाईन गेम खेळताना झालेल्या हत्याप्रकरणी १९ वर्षीय सोहेब शेखला अटक करण्यात आली आहे. गणेश कुऱ्हाडेचा (वय १६) भाऊ कार्तिक आणि त्याचा मित्र सोहेब हे एका मित्राच्या टेरेसवर गेम खेळत होते. कॅरम खेळून झाल्यावर त्यांनी नवा व्यापार हा गेम खेळायला सुरुवात केली. मात्र, खेळता-खेळता वादाला तोंड फुटलं, मग सोहेबने कार्तिकला मारहाण केली. कार्तिकने घरी येताच आपला मोठा भाऊ गणेशला याबाबत सांगितलं. गणेशने सोहेबकडे जात त्याला जाब विचारला.

लहान असताना जाब कसा काय विचारला? या रागातून सोहेबने गणेशच्या पायात-पाय टाकून त्याला सिमेंटच्या रस्त्यावर जमिनीवर आडवं पाडलं अन् लाथांनी मारहाणही केली. या घटनेत गणेशच्या डोक्याला जबर मार लागला. त्याला, तातडीने हॉस्पिटलमध्ये नेण्याचे प्रयत्नही झाले. मात्र, तोपर्यंत उशीर झाला होता. डॉक्टरांनी गणेशला मृत घोषित केलं. किरकोळ वादातून झालेल्या भांडणात एका निष्पाप आणि कुठलाही संबंध नसलेल्या गणेशला आपला जीव गमावावा लागला. निष्पाप गणेशचा आणि आरोपी सोहेबचा काहीच वाद नव्हता. मात्र, भावाला केलेल्या मारहाणीचा जाब विचारला गेला अन् त्याचा नाहक बळी गेला.