अक्षय बडवे

Pune:

पुण्यातून एक धक्कादायाक बातमी समोर आली आहे. लग्नसमारंभात किरकोळ वादातून नवरदेवाच्या हातून गंभीर गुन्हा झालाय. मंगल कार्यालय चालकाशी वाद झाल्याने नवरदेवाला राग अनावर झाला. पुढे रागाच्या भरात नवरदेवाच्या हातून मोठा गुन्हा झाला. त्याने थेट हातात असलेली कट्यार मंगल कार्यालय चालकावर चालवली.  ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

घडलेल्या घटनेमुळे विवाहाच्या दिवशीच नवरदेवावर गुन्हा दाखल झाला आहे. करण सणस यांनी याप्रकरणी पोलिसात तक्रार दिली आहे. या प्रकरणी अभिजीत मिरगणे, राहुल सरोदे यांसह इतर ५ ते ६ जणांवर गुन्हा दाखल करण्यात आला आहे.

पोलिसांनी दिलेल्या माहितीनुसार, सणस यांचे पुणे-सोलापूर रस्त्यावरील उरळी कांचन भागात श्रीकृष्ण मंगल कार्यालय आहे. हा सगळा प्रकार ६ जानेवारी रोजी रात्री ८.३० वाजताच्या दरम्यान याच ठिकाणी घडला. या ठिकाणी आरोपी नवरदेव अभिजीत याचा विवाह संपन्न झाला होता. लग्न सुरळीत पार पडल्यानंतर मोठं विघ्न समोर येणार आहे याची कुणालाच काही कल्पना नव्हती.

विवाह समारंभानंतर अभिजीत आणि नातेवाईक स्टेजजवळ टेबल-खुर्ची मांडून जेवण करत होते. त्यामुळे तेथून इतर काही जणांना ये-जा करता येत नव्हती. मंगल कार्यालय चालक सणस यांनी अभिजीत आणि नातेवाईकांना टेबल-खुर्ची सरकावण्यास सांगितले. या कारणावरून अभिजीत आणि त्याच्याबरोबर असलेल्या नातेवाईकांनी सणस यांच्याशी वाद घालायला सुरुवात केली. सणस यांना शिवीगाळ करुन त्यांच्या हातावर अभिजीतने त्याच्याकडे असणाऱ्या कट्यारने वार केला.

कट्यारीला धार नसल्याने फिर्यादी यांना गंभीर दुखापत झाली नाही. मात्र मारहाणीच्या घटनेमुळे त्यांनी पोलिसांत धाव घेतली. लोणी काळभोर पोलिसांनी या प्रकरणातील आरोपींवर गुन्हा दाखल केला असून पुढील तपास सुरू आहे.