नितीन पाटणकर, ता. १६ जुलै २०२४

खुनाच्या गुन्ह्यात जन्मठेपेची शिक्षा भोगत असलेल्या कैदी येरवडा कारागृहातून पळाल्याची घटना समोर आली आहे. या प्रकाराने पुणे पोलीस दल आणि येरवडा कारागृह प्रशासनामध्ये एकच खळबळ उडाली असून आरोपीच्या शोधासाठी पथके रवाना करण्यात आली आहेत.

याबाबत सविस्तर माहिती अशी की, खुनाच्या गुन्ह्यात जन्मठेपेची शिक्षा भोगत असलेला कैदी येरवडा जेलमधून पसार झाल्याचा धक्कादायक प्रकार समोर आला आहे. आत्माराम ऊर्फ आत्म्या लाडक्या भवर (वय ३४) असे पसार झालेल्या कैद्याचे नाव आहे. या घटनेने येरवडा जेल प्रशासनामध्ये खळबळ उडाली असून पोलीस त्याचा शोध घेत आहेत.

आत्म्या लाडक्या भवर हा मूळचा पालघर जिल्ह्यातील वाडा तालुक्यातील देवीपाडा येथील रहिवासी आहे. त्याने २००९ मध्ये देवीपाडा गावात एकाचा खून केला होता. याप्रकरणी त्याच्याविरुद्ध शहापूर पोलिस ठाण्यात गुन्हा दाखल केला होता. या गुन्ह्यात न्यायालयाने आरोपी भवरला दोषी ठरवत १० जुलै २०१२ रोजी जन्मठेप आणि दोन हजार रुपये दंडाची शिक्षा सुनावली होती.

२०१२ पासून जन्मठेपेची शिक्षा भोगत असलेला भवर येरवडा कारागृहातून पसार झाला. सध्या पोलीस त्याचा शोध घेत आहेत. दरम्यान, कडक सुरक्षा व्यवस्था असलेल्या येरवडा जेलमधून मोठ्या गुन्ह्यातील कैदी पसार झाल्याने कारागृहाच्या सुरक्षेवर प्रश्नचिन्ह उपस्थित होत आहे.