Shocking : मुंबई-कुशीनगर एक्स्प्रेस ट्रेनच्या टॉयलेटमध्ये ५ वर्षीय चिमुकल्याचा मृतदेह आढळल्याने मोठी खळबळ उडाली. दोन दिवसांपूर्वी सुरतमध्ये मुलाच्या अपहरणाची तक्रार दाखल करण्यात आली होती. सुरत पोलिसांचा तपास सुरु असताना ट्रेनमध्ये मुलाचा मृतदेह आढळल्याने खळबळ उडाली. मुलाचा मृतदेह ताब्यात घेऊन पोलिसांनी शवविच्छेदनासाठी पाठवला आहे.

मिळालेल्या माहितीनुसार, २२५३७ क्रमांकाच्या ट्रेनच्या एसी कोच बी२ च्या टॉयलेटमध्ये मुलाचा मृतदेह आढळला. मुलाचे वय सुमारे ५ वर्ष असल्याचे म्हटले जात आहे. ट्रेनच्या एसी कोचच्या टॉयलेटमध्ये ठेवलेल्या कचऱ्याच्या डब्यात मुलाचा मृतदेह प्रवाशांना दिसला. प्रवाशांनी रेल्वे पोलीस आणि प्रशासनाला याची माहिती दिली. त्यानंतर पोलीस घटनास्थळी पोहोचले.

५ वर्षीय मुलाचा गळा चिरुन हत्या करण्यात आली. प्राथमिक माहितीनुसार, मुलाचा २५ वर्षीय चुलत भाऊ हा या प्रकरणातील मारेकरी आहे. ही हत्या कौटुंबिक वादातून घडली असल्याची शक्यता वर्तवली जात आहे. सुरत पोलिसांसह रेल्वे पोलिसांनीही चुलत भावाचा शोध घ्यायला सुरुवात केली आहे. सीसीटीव्ही फुटेज शोधले जात आहे. सुरतहून हा मुलगा कसा पोहोचला? त्याची हत्या कशी झाली? हत्येचे नेमके कारण काय? याचा शोध पोलीस घेत आहेत.

'मुंबई-कुशीनगर एक्सप्रेसच्या कोचमध्ये पहाटे १ वाजता मुलाचा मृतदेह आढळला. प्राथमिक तपासात कौटुंबिक वादातून मुलाची हत्या झाली आहे. मुलाची बेपत्ता असल्याची तक्रार दोन दिवसांपूर्वी सुरतमध्ये नोंदवण्यात आली होती, त्यानंतर सुरत पोलिसांनी मुलाचा शोध सुरु केला', अशी माहिती रेल्वे आयुक्त राकेश कला सागर यांनी आहे.