संजय गडदे, साम प्रतिनिधी

देशाची आर्थिक राजधानी असलेल्या मुंबईला पुन्हा एकदा एका नराधमाच्या कृत्याने काळीमा फासला आहे. दक्षिण मुंबईतील पायधुनी परिसरात अवघ्या ७ वर्षांच्या निष्पाप मुलीवर एका गोदामाच्या सुरक्षा रक्षकाने (वॉचमन) लैंगिक अत्याचार केल्याची धक्कादायक आणि संतापजनक घटना रविवारी दुपारी घडली.

या अमानुष कृत्यामुळे संपूर्ण पायधुनी परिसरात तीव्र संतापाची लाट उसळली असून, संतप्त नागरिकांनी आरोपीला फाशी देण्याच्या मागणीसाठी पायधुनी पोलीस ठाण्याला घेराव घातला आणि रस्त्यावर उतरून जोरदार 'रास्ता रोको' आंदोलन केले. याप्रकरणी 32 वर्षीय आरोपीला पायधुणी पोलिसांनी गुन्हा दाखल करून अटक केली आहे.

​मिळालेल्या माहितीनुसार, रविवार सुट्टीचा दिवस असल्याने पीडित चिमुरडी दुपारी खेळण्यासाठी घराबाहेर पडली होती. मात्र, दुपारचे अडीच वाजून गेले तरी ती घरी परतली नाही. त्यामुळे तिच्या आईने आणि शेजाऱ्यांनी परिसरात तिची शोधशोध सुरू केली. शोध घेत असताना, कुर्ला स्ट्रीट, दिल्ली स्टँड परिसरातील एका गोदामाच्या (गोडाऊन) पोटमाळ्यावर ही ७ वर्षांची मुलगी गंभीर आणि रक्तबंबाळ अवस्थेत आढळून आली. मुलीची ही अवस्था पाहून शोध घेणाऱ्या नागरिकांनी एकच आरडाओरडा केला.

गोदामात मुलीसोबत घडलेला प्रकार पाहून शेजारी आणि स्थानिक नागरिक मोठ्या संख्येने जमा झाले. संतापलेल्या जमावाने घटनास्थळीच असलेल्या नराधम सुरक्षा रक्षकाला पकडून चांगलाच बेदम चोप दिला आणि त्यानंतर त्याला पायधुनी पोलिसांच्या स्वाधीन केले.