संजय गडदे, मुंबई

बदलापूरमध्ये काहीदिवसांपूर्वी एका मुलीवर स्कुल व्हॅनमध्ये अत्याचार करण्यात आले. ही घटना ताजी असतानाच मुंबईतील मालाडमध्ये एका नामांकित शाळेतील शिपायाने ५ वर्षीय मुलीवर अत्याचार केले. या घटनेने पालकवर्गातून संताप व्यक्त केला जात आहे. दरम्यान मुलीच्या पालकांनी संबंधित शिपायावर आणि शाळेच्या CEO विरोधात तक्रार दाखल केली आहे. पोलिसांनी आरोपीसह शाळेच्या मुख्य अधिकाऱ्याला अटक केली असून पुढील तपास सुरु आहे.

मिळालेल्या माहितीनुसार, सदर घटना मुंबईतील मालाडमधील नामांकित शाळेत १२ जानेवारीला घडली होती. ५ वर्षीय मुलीवर शाळेच्या शिपायाने धमकावून तिला धाक दाखवत तिच्यावर अत्याचार केले. मात्र, मुलीने पालकांना याबद्दल काहीचं सांगितले नाही. मुलीच्या वागण्यात बदल जाणवल्यानंतर पालकांना संशय आला.

या संशयावरून पालकांनी विचारपूस केली असता तिने पालकांना घडलेला प्रकार सांगितलं. मुलीच्या सांगण्यावरून तिच्या पालकांनी ६ फेब्रुवारीला पोलीस ठाण्यात तक्रार दाखल केली. यानंतर पालकांनी शाळेच्या अधिकाऱ्यांना जाब विचारला असता त्यांना धमकावण्यात आलं.

दरम्यान मुलीच्या पालकांच्या तक्रारीवरून शाळेचा शिपाई अनिल पांचाळ (वय ३०) आणि शाळेचा सीईओ अनंत यज्ञीक (वय ६५) यांच्या विरोधात पोलिसांनी बीएनएस कलम ७४, ३५१ (२) आणि पोक्सो कलम १०,१७,२१ (२) अंतर्गत गुन्हा दाखल केला आहे. शाळेसारख्या सुरक्षित ठिकाणी अशा प्रकारची घटना घडल्याने पालकांमध्ये भीतीचे वातावरण आहे. या घटनेनंतर मालाड परिसरातील पालक आणि स्थानिक नागरिकांनी तीव्र संताप व्यक्त केला आहे.