भाऊ बहिणीच्या नात्याला काळिमा फासणारी घटना घडली आहे. उत्तर प्रदेशातील मिर्झापूर जिल्ह्यातील एका गावात १३ वर्षीय मुलीवर सामूहिक बलात्कार करण्यात आला आहे. धक्कदायक म्हणजे या कट कारस्थानात तिच्या भावाचा हात असल्याचे पोलीस तपासात उघडकीस आले आहे. या प्रकरणी पोलिसांनी तिघांना ताब्यात घेतले आहे.

मिळालेल्या माहितीनुसार, सदर घटना ही उत्तर प्रदेशातील मिर्झापूर जिल्ह्यातील ग्रामीण कोतवाली भागातील एका गावात घडली आहे. पीडित मुलगी ही १३ वर्षांची असून तिच्या चुलत भावाने कारण सांगून तिला एका निर्जन स्थळी नेले. पीडितेचा भाऊ आणि पीडित मुलगी निर्जन स्थळी गेले असता तिथे त्याचे दोन मित्र आले. बराच वेळ त्यांच्यात गप्पा रंगल्या होत्या. गप्पा झाल्यानंतर पीडितेच्या भावाने तिच्यावर जबरदस्ती केली. पीडितेने नकार दर्शवल्यानंतर पीडितेच्या भावाच्या मित्रांनी तिच्यावर बलात्कार केला.

बलात्कार केल्यानंतर पीडितेला घटनास्थळी सोडून तिघेही फरार झाले. तिन्ही आरोपींनी क्रूरतेच्या सर्व मर्यादा ओलांडल्या आणि पीडितेला गंभीर जखमी केले. आजूबाजूच्या नागरिकांच्या मदतीने तिला गंभीर अवस्थेत रुग्णालयात दाखल करण्यात आले. सध्या तिची प्रकृती गंभीर असून तिच्यावर उपचार सुरु आहेत.

घडलेल्या प्रकारानंतर पोलिसांनी घटनास्थळी धाव घेत तपास सुरु केला आहे. शिवाय पीडितेने दिलेल्या जबाबानुसार, तिच्या अशा परिस्थितीला तिचा भाऊ जबाबदार असल्याचे तिने म्हटले आहे. तिच्या भावासोबत त्याच्या मित्रांचाही यात हात आहे. दरम्यान पोलिसांनी दाखल केलेल्या तक्रारीवरून आरोपीविरुद्ध भारतीय दंड संहितेच्या संबंधित कलमांखाली आणि लैंगिक गुन्ह्यांपासून मुलांचे संरक्षण (POCSO) कायद्याअंतर्गत गुन्हा दाखल केला आहे.या तिन्ही नराधमांना पोलिसांनी ताब्यात घेतले असून त्यांना बालसुधार गृहात पाठवण्यात आले आहे.