इंदूर : उद्योगपती राजा रघुवंशी हत्याकांडाच्या तपासात पोलिसांना मोठं यश मिळालं आहे. मेघालय पोलीस आणि इंदूर गुन्हे शाखेच्या संयुक्त पथकाने खून प्रकरणातील महत्त्वाचा आरोपी विशाल चौहान याच्या इंदूर येथील घराची झडती घेतली. या झडतीत पोलिसांनी आरोपीचे कपडे जप्त केले आहेत, जे राजाच्या हत्येच्या वेळी आरोपीने घातले होते. एवढेच नाही तर पोलीस आता आरोपीचा मोबाईल देखील शोधत आहेत, जो तपासाच्या दृष्टिकोनातून महत्त्वाचा मानला जातो.

राजा रघुवंशी याला मारण्यासाठी पहिला हल्ला आरोपी विशाल चौहानने केल्याची पुष्टी गुन्हे शाखेच्या एसीपी पूनम चंद्र यादव यांनी केली आहे . दरम्यान, पथक आरोपीसह आरोपीच्या घरी पोहोचले आणि घटनास्थळावरून पुरावे गोळा केले. पोलिसांनी त्याच्या कुटुंबातील सदस्यांचीही चौकशी केली आहे. घराची झडती घेण्यासाठी आलेल्या पोलिसांना घराची चावी न मिळाल्याने ते गेटवरून उडी मारून घरात गेले.

घराचा प्रत्येक कोपरा शोधला

आरोपी विशाल चौहानच्या घरात प्रवेश करणाऱ्या पोलीस पथकाने घराच्या प्रत्येक कोपऱ्याची झडती घेतली. यावेळी त्यांना घरातून अनेक महत्त्वाच्या वस्तू सापडल्या, ज्याबद्दल गुन्हे शाखेने अद्याप पूर्ण माहिती दिलेली नाही. परंतु सर्वात महत्त्वाचा पुरावा म्हणजे घटनेच्या वेळी विशालने घातलेले कपडे. त्यावर राजाच्या रक्ताच्या खुणा असण्याची शक्यता आहे, कारण त्यानेच पहिला हल्ला केला होता.

शिलाँग पोलीस गांभीर्याने तपास करत आहेत

शिलाँग पोलीस या हत्येचा गांभीर्याने तपास करत आहेत. अतिरिक्त डीसीपी राजेश दंडोतिया यांच्या मते, शिलाँगमधील तीन पथकांनी संपूर्ण प्रकरणाचा तपास हाती घेतला आहे. तसेच, इंदूर पोलीस सतत सहकार्य करत आहेत. तथापि, दंडोतिया यांनी असंही सांगितलं की, २५ मे रोजी शिलाँगहून सिलीगुडीमार्गे सोनम रघुवंशी ट्रेनने इंदूरला आल्याची माहिती शिलाँग पोलिसांनी अधिकृतपणे शेअर केलेली नाही.

सागर येथून अटक केलेल्या आरोपीला रिमांड मिळाला

दरम्यान, या प्रकरणातील आणखी एक आरोपी आनंद कुर्मीला बीना येथील बसहरी गावातून अटक करण्यात आली. मंगळवारी सकाळी त्याला इंदूर न्यायालयात हजर करण्यात आलं, जिथे न्यायालयाने त्याला मेघालय पोलिसांच्या कोठडीत सोपवलं. राजा रघुवंशी हत्याकांडात आतापर्यंत अनेक महत्त्वाचे खुलासे झाले आहेत आणि पोलिसांचे म्हणणे आहे की लवकरच संपूर्ण प्रकरण समोर येईल.