संघर्ष गांगुर्डे, कल्याण प्रतिनिधी

कल्याणमध्ये विक्रेता आणि ग्राहकामध्ये शनिवारी रात्रीच्या सुमारास राडा झाल्याची घटना घडली आहे. हॉटेल मालक बचारामर मोऱ्या यांच्या हॉटेलमध्ये दारूच्या नशेत आलेल्या गावगुंड दिनेश लंके याने हैदोस घातला. बचारामर यांनी दिनेशला थोडावेळ थांबायला सांगितल्याने दिनेशने हॉटलेमालकाला शिवीगाळ तसेच हाणामारी केली. या घटनेचा व्हिडिओ सीसीटीव्हीमध्ये कैद झाला आहे. धक्कदायक म्हणजे काही दिवसांपूर्वीच दिनेश एका जुन्या गुन्ह्यातून जामीनावर सुटून बाहेर आला आहे.

मिळालेल्या माहितीनुसार, कल्याण पूर्व येथील नितीन राज हॉटेलच्या बाजूला असलेल्या वडा-इडलीच्या दुकानावर शनिवारी रात्री सराईत गुन्हेगार दिनेश लंके दारूच्या नशेत आला होता. त्याने हॉटेलचे मालक बचारामर यांच्याकडे 'मला दाल वडा बनवून दे' अशी मागणी केली. हॉटेल मालकांनी लंकेला 'थोडा वेळ थांबा' असे सांगितले. बचारामर यांनी असे सांगितल्याने दिनेशची तळपायाची आग मस्तकात गेली. त्याने बचारामर यांना शिवीगाळ करण्यास सुरुवात केली.

त्यांनतर परिस्थिती आणखी चिघळली. हॉटेल मालक बचारामर यांनी लंकेच्या कृतीला प्रतिउत्तर देण्याचा प्रयत्न केला. दुकानदाराचा प्रतिकार पाहून लंके अधिक आक्रमक झाला. त्याने त्वरित हत्यार काढले आणि ते दुकानदाराला दाखवून धमकावले. या गुंडगिरीपुढे हतबल झालेल्या हॉटेल मालकाला लंकेने चक्क हात जोडून पाया पडायला लावले. हा संपूर्ण थरार परिसरातील सीसीटीव्हीमध्ये कैद झाला आहे.

दिनेश लंके हा कल्याण पूर्वेतील सराईत गुन्हेगार असून, काही दिवसांपूर्वीच तो एका जुन्या गुन्ह्यातून जामीनावर सुटून बाहेर आला आहे. पुन्हा एकदा परिसरात दहशत निर्माण करण्याचा त्याचा प्रयत्न असल्याचा आरोप स्थानिक नागरिक करत आहेत. या घटनेमुळे स्थानिक व्यापारी आणि हॉटेल चालक यांच्यात युतीचे वातावरण आहे. यामुळे सराईत गुन्हेगार आणि भाईंवर कडक कारवाई करावी, अशी मागणी जोर धरू लागली आहे. याप्रकरणी कल्याण कोळसेवाडी पोलिसांनी गुन्हा दाखल केला असून, आरोपी दिनेश लंकेचा कसून शोध सुरू केला आहे.