Crime : एका महिलेने प्रियकराच्या मदतीने पतीची हत्या केली. हत्या करुन त्यांनी मृतदेहाचे तुकडे करुन एका ड्रममध्ये लपवले. या प्रकरणी पोलिसांनी महिला आणि तिच्या प्रियकराला अटक केली आहे. उत्तरप्रदेशच्या मेरठमधील या धक्कादायक घटनेमुळे मोठी खळबळ उडाली आहे. दरम्यान राजस्थानच्या जयपूरमध्ये मेरठच्या हत्याकांडाची पुनरावृत्ती झाल्याचे म्हटले जात आहे.

काय आहे प्रकरण?

राजस्थानच्या जयपूरमधील गोपाली देवी सैनी (वयवर्ष ४२) या महिलेचे दीनदयाल (३०) नावाच्या व्यक्तीसोबत प्रेमसंबंध होते. गोपाली देवी या दीनदयाल याच्या दुकानामध्ये काम करत असे. तर तिचा नवरा धन्नालाल सैनी हा भाजी विकण्याचे काम करत असे. धन्नालालला दोघांच्या प्रेमसंबंधांबद्दल समजले. रागाच्या भरात तो दीनदयालच्या दुकानात पोहोचला. दीनदयाल, गोपाली देवी आणि धन्नालाल यांच्या बाचाबाची झाली. पुढे भांडणाचे रुपांतर हाणामारीत झाले. तेव्हा गोपाली देवी आणि दीनदयाल यांनी केलेल्या मारहाणीमध्ये धन्नालालचा मृत्यू झाला.

पोलिसांनी दिलेल्या माहितीनुसार, नवऱ्याचा मृतदेह गोपाली देवी आणि तिच्या प्रियकराने प्लास्टिकच्या एका गोणीत भरला. त्या मृतदेहाची विल्हेवाट लावण्यासाठी गोणी दुचाकीवरुन एका अज्ञात ठिकाणी नेली. ठरलेल्या जागी पोहचल्यावर त्यांनी गोणीसकट मृतदेह जाळला. दुसऱ्या दिवशी सकाळी स्थानिक लोकांनी जळालेल्या मृतदेहाची माहिती पोलिसांना दिली.

तपास करुन पोलिसांनी आरोपी गोपाली देवीला ताब्यात घेतले आहे. चौकशीदरम्यान गोपाली देवीने गुन्ह्याची कबुली दिली. हत्या केल्यानंतर धन्नालालचा मृतदेह प्लास्टिकच्या गोणीत भरला आणि ७ किलोमीटर लांब ठिकाणी जाऊन जाळला, असे तिने पोलिसांना सांगितले. त्यानंतर पोलिसांनी गोपाली देवीच्या पतीला देखील ताब्यात घेतले.