तामिळनाडूतून खळबळजनक घटना समोर आली आहे. हॉस्टेलमध्ये राहणाऱ्या बायकोची नवऱ्याने निर्घृण हत्या केली आहे. बायकोची हत्या करून नवऱ्याने व्हाट्सअॅप स्टेटसवर मृतदेहाचा फोटो शेअर केल्यानंतर संपूर्ण धक्कादायक प्रकार उघडकीस आला. हे हत्याकांड उघडकीस आल्यानंतर हॉस्टेलमध्ये एकच खळबळ उडाली. या हत्याकांडानंतर विरोधकांनी महिलांच्या सुरक्षेवर प्रश्नचिन्ह उपस्थित केले आहेत.

मिळालेल्या माहितीनुसार, ३२ वर्षीय व्यक्तीने हॉस्टेलमध्ये त्याच्या बायकोची हत्या केली. पोलीस घटनास्थळी पोहोचल्यानंतर त्याने स्वत:ला पोलिसांना शरण गेला. त्याची २८ वर्षीय बायको कोयंबटूरमधील एका खासगी कंपनीत काम करत होती. वादानंतर नवऱ्यापासून वेगळं होऊन हॉस्टेलमध्ये राहत होती. ती मूळची तिरुनेलवेली जिल्ह्यातील मेलापलायमजवळ थारुवाई येथे राहायला होती.

नेमकं काय घडलं?

पोलिसांनी दिलेल्या माहितीनुसार, पती एस. बालामुरुगन रविवारी दुपारी बायकोला भेटायला हॉस्टेलमध्ये गेला. त्यानंतर दोघांमध्ये वाद झाल्यानंतर नवऱ्याने बायकोची हत्या केली. त्यानंतर नवऱ्याने बायकोच्या मृतदेहासोबत सेल्फी काढला. मृतदेहासोबत काढलेला सेल्फी व्हाट्सअॅप स्टेटसवर ठेवलं. त्याने स्टेटससोबत मला पत्नीने धोका दिला, असे कॅप्शन देखील दिले.

नवऱ्यासोबत सततच्या वादामुळे २८ वर्षीय महिला तिच्या दोन मुलांना आईकडे सोपवलं होतं. त्यानंतर ती स्वत: हॉस्टेलमध्ये राहत होती. या प्रकरणी रथिनापुरी पोलीस स्टेशनमध्ये हत्येचा गुन्हा नोंदवण्यात आला आहे. या प्रकरणी पोलिसांनी पुढील तपास सुरू केला आहे.

हॉस्टेलमध्ये पुरुष नेमका कसा घुसला, यावरून विरोधकांनी प्रश्न उपस्थित केले आहेत. त्यात हॉस्टेलमध्ये घुसून महिलेची हत्या केल्याने विरोधकांनीही अनेक सवाल उपस्थित केले आहेत. त्यांनी आरोपीवर कठोर कारवाईची मागणी केली आहे.