भावाच्या नात्याला काळिमा फासणारी दुर्दैवी घटना समोर आली आहे. एका मुलाने त्याच्या भावाची आणि आईची निर्घृण हत्या केली आहे. धक्कदायक म्हणजे धाकट्या भावावर आई जास्त प्रेम करते म्हणून मोठ्या भावाने रागाच्या भरात हे पाऊल उचललं असल्याचं उघडकीस आलं आहे. सदर घटना आंध्र प्रदेशातील पश्चिम गोदावरी जिल्ह्यात घडली आहे. या घटनेने परिसरात भीतीचे वातावरण निर्माण झाले आहे. आरोपीचे नाव श्रीनिवास आहे तर आई महालक्ष्मी आणि धाकटा भाऊ रवी तेजा याचा मृत्यू झाला आहे.

मिळालेल्या माहितीनुसार, आंध्र प्रदेशातील पश्चिम गोदावरी जिल्ह्यात रविवारी रात्री उशिरा श्रीनिवास आणि त्याच्या आईच कडाक्याचं भांडण झालं. श्रीनिवासला बऱ्याच काळापासून असे वाटत होते की त्याची आई नेहमीच त्याच्या धाकट्या मुलाची बाजू घेते. कुटुंबातील कोणत्याही वादात श्रीनिवास नेहमीच एकटा पडायचा. यामुळे आईच्या अशा वागण्याचा त्याला सतत त्रास व्हायचा आणि राग येत होता.

रविवारी रात्री आईसोबत झालेल्या वादात श्रीनिवासच्या पोटात असलेल्या रागाचा उद्रेक झाला. रागाच्या भरात त्याने स्वयंपाकघरातून चाकू आणला आणि त्याने त्याच्या आई आणि भावावर वार केले. महालक्ष्मी आणि रवीचा आवाज ऐकून शेजारचे तातडीने घटनास्थळी आले. शेजारी येईपर्यंत ते दोघेही रक्ताच्या थारोळ्यात जमिनीवर पडले होते. दोघांनाही रुग्णालयात घेऊन जाण्यापूर्वीच त्यांचा जागीच मृत्यू झाला होता.

या हत्येनंतर श्रीनिवासने स्वतः पोलिसांना फोन करून घडलेल्या घटनेची माहिती दिली, शिवाय त्यानेच ही हत्या केल्याचंही कबूल केलं. प्राथमिक चौकशीत आरोपीने आपला गुन्हा कबूल केला आणि तो मानसिकदृष्ट्या खचलेला असल्याचे सांगितले. दुहेरी हत्याकांडाच्या या घटनेने संपूर्ण परिसरात खळबळ उडाली असून भीतीचे वातावरण निर्माण झाले आहे. पोलिसांनी भारतीय दंड संहितेच्या कलम १०३ अंतर्गत गुन्हा दाखल करून तपास सुरू केला आहे.