भुषण अहिरे, साम टीव्ही न्यूज

Dhule Crime News Update : तरुणाला ठेचून मारल्यानंतर मृत तरुणाच्या नातेवाईकांनी तरुणाचा मृतदेह संबंधीत मारेकऱ्यांच्याच घरासमोर आणून अंत्यविधी केल्याची धक्कादायक घटना शिरपूर तालुक्यातील मध्यप्रदेश सीमेवर असलेल्या कालापाणी या गावात घडली आहे. मृत तरुणाच्या गावातील ग्रामस्थांनी मारेकऱ्यांच्या घराची देखील नासधूस केली आहे. त्यानंतर गावातील ग्रामस्थ गाव सोडून गावाबाहेर राहण्यासाठी निघून गेले आहेत. तरूणाला मारणाऱ्या सात जणांपैकी एकाला शिरपूर तालुका पोलिसांनी ताब्यात घेतले आहे.

शिरपूर तालुक्यातील उमरगा या गावात राहणारा कमलसिंग वसावे हा वीस वर्षीय तरुण आपल्या प्रियसीला भेटण्यासाठी तिघा मित्रांसह शिरपूर तालुक्यातील कालापाणी या गावात गेला होता. प्रियसीच्या कुटुंबीयांच्या ही बाब लक्षात आल्यानंतर नातेवाईकांनी चौघा तरुणांना एका घरात डांबून ठेवलं. त्यानंतर त्यांना जबर मारहाण केली, त्यातून एका तरुणाने पळ काढण्याचा प्रयत्न केला, परंतु संतप्त नातेवाईकांनी या तरुणाला पकडत त्याला जबर मारहाण केली. यात या तरुणाचा दुर्दैवी मृत्यू झाला, या तरुणाचा मृतदेह नाल्यात फेकत संतप्त मुलगा अंधारात पळून गेल्याचा बनाव केला.

ही बाब पोलीसांच्या निदर्शनास आल्यानंतर पोलिसांनी मारेकऱ्यांपैकी एकाला ताब्यात घेतले. त्यातील आणखी फरार सहा आरोपींचा पोलीस शोध घेत आहेत. परंतु मृत तरुणाच्या नातेवाईकांनी तरुणाचा मृतदेह संबंधित मारेकऱ्याच्या घरासमोरच आणून त्याचा अंत्यविधी केला. या प्रकारामुळे गावात प्रचंड भीतीचे वातावरण पसरल्याने गावातील ग्रामस्थ गाव सोडून गावाबाहेर निघून गेले आहेत.